Leilani Werleman, un studiante Arubiano di ley na De Haagse Hogeschool, a inicia un etapa importante den su carera profesional. Werleman,ta den su di cuater y ultimo aña di e estudio International and European Law, a drenta e fase practico obligatorio di su formacion. E la logra obtene un cupo di stage sumamente importante den Tweede Kamer na Hulanda.
E studiante ta formando parti di e departamento di Relacionnan den Reino (Koninkrijksrelaties), un area clave pa e lasonan politico y legal entre Hulanda y e islanan den Caribe. Werleman a expresa di ta “super, super contento” cu e oportunidad aki, reconociendo e balor grandi cu esaki tin pa su futuro.
Segun Werleman, e experencia aki den curason di e politica Hulandes ta un plataforma ideal cu por habri hopi porta p’e. Despues di a biba y studia pa cuater aña na Hulanda, e studiante a splica cu e proceso di adaptacion a bay hopi lihe y sin problema.
Mi a adapta hopi lihe aki, dus e no tabata dificil p’ami. E no tabata un ‘struggle’ y tur cos ta bayendo basta bon awor,” Werleman a declara.
Actualmente, e stage aki ta fungi como un espacio pa e por experimenta y mira structuralmente den cua direccion exacto e kier dirigi su mes den e campo di derecho.
Pa locual ta trata su plannnan pa futuro ora e caba su estudio, e studiante a admiti cu su enfoke pa awor e ta keda na Hulanda. Maske e por cambia di opinion despues, Werleman a señala cu na e momentonan aki e ta mira mas oportunidad di crecimento den e mercado laboral Hulandes.
Mi ta kere cu pa awor structuralmente, mi ta mira cu tin mas porta ta habriendo pa mi aki na Hulanda cu na Aruba,” el a conclui, indicando tambe cu e realidad aki ta conta pa hopi otro studiante Arubiano cu ta biba y studia na Hulanda.
