KRALENDIJK, Bonaire
E preparashon pa renobashon di e wafnan den nos haf ta progresando bon. Enfoke di e planifikashon ta pa terminá ku e trabounan na Waf Nelson Petrus ‘Nello’ Craane, Waf di Piskadó i Waf di Chachacha promé ku e temporada nobo di krusero kuminsá.
Mañan (djaweps 20 di febrüari) ta kuminsá ku demolishon di Waf di Chachacha. Ta kita tur e partinan di palu kompletamente. Esei ta nesesario pa por hasi midimentu eksakto. A base di e midimentunan aki ta traha un konstrukshon nobo di stal. ‘Na luna di aprel ta transportá e waf nobo ku barku for di Hulanda. E instalashon ta tuma lugá na luna di mei i despues di esei na luna di yüni ta entregá e Waf di Chachacha nobo’, segun kapitan di haf Günther Flanegin. E ta supliká tur hende pa no subi riba e waf durante ku e trabounan ta tuma lugá. Esaki ta pa nan mes siguridat.
Waf di Chachacha ku ta den mal estado a yega na fin di su bida. Ku bista riba siguridat di landadónan i sambuyadónan ta pone un balustrada i trapi di stal na e waf nobo. E trabou a bira posibel tambe pa medio di un kontribushon di ministerio di Infrastruktura i Maneho di Awa.
Riba potrèt:
Mañan ta kuminsá ku demolishon di Waf di Chachacha ku ta den mal estado (Foto: OLB).
