Politica

Ta inacceptable cu Minister na un forma dictatorial kier muda Paso pa Futuro

Mervin Wyatt Ras

ORANJESTAD,Aruba

Parlamentario Mervin Wyatt-Ras ta lamenta cu gobierno y especialmente minister di Ensenjansa no ta sali na vanguardia di derecho di mucha. Den e siman aki maestronan a bin ta manifesta nan disgusto tur dia pa medio di cierto accionnan ludico na nan skolnan, manera p.e. pitra auto y tambe para dilanti skol cu pankarta.
 Wyatt-Ras tabata presente na Skol Paso pa Futuro diaranson atardi pa sostene maestronan y mayornan. Minister di Ensenjansa kier muda e skol aki sin tene cuenta cu e muchanan y nan necesidadnan. Na e edificio aki panord di Postkantoor tin lokaal pa traha obranan di man y tambe tin un cushina. E muchanan ta sinja “life skills” pa man por defende nan mes mihor den aspectonan social (sociale redzaamheid). 


E muchanan ta special y no ta machinnan cu por ser kita djaki pa pone aya. Nan no ta muchanan cu por cu cambio facilmente y nan mayornan lo mester bai hiba nan skol mas leu for di cas. En especial den e temporada dificil aki cu nos pais ta pasando aden esaki no ta acceptable. E minister ta carece na comprension pa e muchanan y nan necesidadnan. E forma dictatorial con e minister kier saca e muchanan y maestronan no ta husto. Kier core cu e muchanan di Paso pa Futuro. Manera por a compronde lo kier pone muchanan di Beatrixschool den e edificio mientras cu  Beatrixschool su edificio te ainda no a ser drecha dor di e gobierno aki.  
Wyatt-Ras ta di opinion cu mester stop tur e cambionan cu e minister kier bin cun’e. E kier integra/fuseer skolnan publico cu protestant sin tene cuenta cu e forma di pensa y religion di muchanan y nan mayornan. Tambe e kier introduci skol riba distancia sin tene cuenta cu posibilidadnan y debilidadnan di skolnan y mayornan cu no tin computer ni internet pa e muchanan. Aki e muchanan di menos recurso lo sufri e consecuencianan. Tambe e kier apertura di skolnan despues di COVID cu tur consecuencia cu esaki por tin cu’e pa loke ta trata hygiena y salud si e muchanan. 


Maestronan, docentenan, hoofdnan y sindicatonan SIMAR, SEPA y STA a demostra y entrega carta na gobierno y Parlamento. Durante un reunion publico cu e minister, fraccion di AVP a entrega un mocion di desconfiansa contra  e minister, mientras coalicion a sostene e minister y entrega mocionnan pa sostene maneho di e minister. Despues Parlamento a reuni cu SIMAR cu a trece padilanti cu e minister no ta dialoga ni comunica cu nan. Un dado momento minister di Asuntonan General a anuncia cu e ta para tur cambio. Sinembargo minister Lampe a sigui cu loke el a bin ta haci y a bisa cu elo dialoga tocante implementacion pero di cambionan cu el a anuncia. Esey kiermeen cu nada lo par’e di sigui locual e kier logra. Wyatt-Ras ta spera cu por considera derechonan di mucha dor di e gobierno aki cu a bisa cu p’e e hende lo ta central sinbargo mas y mas ta resulta cu hende no ta central pa e gobierno aki. Ta prefera di skapa e coalicion, cu no ta synchronisa nan maneho, y conserva nan posicion enbes di defende interes di ensenansa y nos muchanan.

Related posts

Plan strategico di minister di enseyansa ta papia pa su mes

EA News Author

Persona cu a leak e informacion confidencial di pashentnan mester para responsabel pa su actonan

EA News Author

Parlamentario Endy Croes: Mike De Meza y Mike Eman a gaña atrobe. “Rapport Bo Aruba a demostra cu Lotto no a hinca ningun placa den Joe Laveist Sportpark”

EA News Author

Leave a Comment

Whatsapp Message