Oranjestad – Profesionalnan riba derecho di mucha di e entidadnan den Reino Hulandes ta bolbe topa otro siman. Durante e conferencia di hubileo aki, ta para keto na e logronan di ultimo 5 aña. Alabes lo wak dilanti, pa mira con e Taskforce por crea e cuadronan necesario den futuro cercano, pa brinda tur mucha y hoben den Reino e oportunidad pa por crece saludabel, safe y cu amplio posibilidad pa desaroya nan mes.
Den e temponan nunca bisto aki di COVID-19, toch e conferencia anual ta sigui. E biaha aki e Taskforce di Reino encarga cu Derecho di Mucha a dicidi pa laga e di 5 conferencia tuma luga di forma digital. Ta importante pa permiti profesionalnan riba tereno di derecho di mucha mantene nan mes na altura di desaroyonan nobo y tambe facilita cu tur e islanan por traha riba nan plannan pa futuro.
Durante e edicion aki di e conferencia anual, cu lo tuma luga diamars 24 y diaranson 25 di november di 8:30 AM pa 12:30 PM, lo trata dos tema clave: monitoreo & evaluacion y e impacto social di COVID-19 riba mucha. Lo trata e temanan aki durante un transmision digital interactivo. Durante e dos dianan aki profesionalnan riba diferente area di trabou lo comparti nan experiencianan y tambe resultado di investigacion haci, relaciona cu e dos temanan menciona.
E Taskforce di Reino ta fiha su mes riba futuro, cu enfoke riba, entre otro, colaboracion y intercambio di conocemento den Reino, riba tereno di derecho di mucha. Den cuadro di esaki ta trahando duro riba un plataforma digital di conocemento, cu ta representa e siguiente paso firme riba caminda pa mas profesionalismo riba tereno di educacion positivo y combatimento di violencia den educacion, entre otro puntonan di enfoke.
Por participa na e conferencia aki registrando na: https://www.ourchildrenourfuture.nl/
Pa mas informacion, por fabor tuma contacto cu sra. Sacha Geerman na telefon 593-7078.
