BonaireFeaturedInternacional

TCB, Gobièrnu di Boneiru i Indebon a rekonosé Gyairon Martis komo embahador di Boneiru

Gobiernu Di Boneiru I Indebon A Rekonose Gyairon Martis Komo Embahador Di Boneiru

Tourism Corporation Bonaire (TCB) konhuntamente ku gobièrnu di Boneiru i Indebon a duna homenahe i rekonosementu na Gyairon Martis komo embahador di Boneiru. Gyairon Martis, un hóben deportista multitalentoso, nasé na Boneiru dia 22 di yanüari 2000, a keda honrá i rekonosé pa su tremendo prestashon den e mundu deportivo. Gyairon ta un deportista ku a praktiká diferente deporte manera beisbòl, sòftbòl, pinpòn i tambe biar. Na edat hóben Gio manera nan ta yam’é, a kuminsá praktiká beisbòl ku apenas 4 aña di edat. Gio a forma parti tambe den selekshon di Little League hungando kontra paisnan manera Kòrsou, Puerto Rico i Santo Domingo.

Den sòftbòl Gio a hunga den ekipo di Energizer, na unda na aña 2019 nan a titulá kampion di e torneo ‘Harma Bini Aden’. Ku 14 aña Gio a kuminsá praktiká pinpòn na Jong Bonaire. Su logronan praktikando e deporte akí tabata Kampion Ranking U-15 i di dos lugá den duo ku Leogino Melaan den klase U-15 i U-18.

Gio a praktiká biar tambe ku su 8 aña di edat. Diferente persona ku a yuda Gio den e deporte akí tabata Jimmy i Gregory Frans i tambe Randolf Cicilia. Su tata Aaron Martis ku a mira e interes ku Gio tabatin pa biar, a kumpra un mesa profeshonal pone na kas pa Gio por a praktiká. Biar a hasi Gio un deportista internashonal, na unda el a partisipá den diferente kampionato Pan-Amerikano den Bola 9, pero tambe den ‘pool’ 8, 9 i 10 na diferente pais manera Colombia, Shanghai – China i Rusia.

Na aña 2018 Gio a bai sigui ku su estudio na Hulanda i a terminá esaki ku éksito. Na luna di novèmber 2022 Gio a bai dediká su mes atrobe na su deporte preferí ku ta biar, i akí tabata e momentu ku doño di e ekipo The Hague 51, Staaf Verharen su bista a kai riba Gio, mirando e talento i pashon ku e tabata desplegá riba mesa di biar. Gio a hasi su debut na Hulanda den Divishon di Honor ku su ekipo The Hague 51. E ekipo akí ta konosí pa diferente biarista famá  na Hulanda i tambe mundialmente. Den e divishon akí tambe Gio a destaká i a gana su promé dos weganan.

TCB, gobièrnu di Boneiru i Indebon ta gradisí Gyairon pa su kontribushon balioso pa mantené Boneiru su nòmber na haltu riba nivel internashonal i ta rekonosé Gyairon komo embahador di Boneiru.

Related posts

Traspaso automatico di pashentnan di dokter di cas Carlos Yagua Fingal pa oficina di dokter di cas (temporal) na hospital

EA News Author

Sintoma di narcista den cas ta turbulento y pafo ta famia perfecto

EA News Author

Minister di Enseñansa: Diamars awor lo presenta e plan di maneho di enseñansa 2021 -2025

EA News Author

Leave a Comment

Whatsapp Message