Nos tur como hende muhe ta fuerte den diferente aspecto den nos bida. Simplemente kico ta e rumbo cu nos ta hiba ta haci nos un roll model di un otro ser humano. Ta orguyoso di ta un hende muhe. Como e prome hende muhe cu su propio plataforma di MEDIA EAnews.com na Aruba ta significa hopi pa mi persona y pa hopi otro na Aruba y den exterior, luchando añanan den e mundo di machismo, cu e hende homber a domina pa varios aña no ta facil.
Hopi biaha nan ta rebaha hende muhe y mustra nan impotencia como hende homber y pensamento pa rebaha y of insulta, sin recorda y tene na cuenta cu un media tin como TAREA pa informa y educa, no duna bo opinion y tampoco bully un comunidad of miembronan di e comunidad.
E situacion aki no ta pasa solamente den e epoca aki, pero prome cu mi a nace ya caba hende muhe no tabatin mucho bos, sinembargo importante ta pa ta mentalmente fuerte y di sa KEN BO TA y studia, no tin ningun ser humano cu por kibra bo.
Hopi di nos hende muhenan ta leonanan, cu ta sigui padilanti. E trabao mes di raporta y haci investigacionnan na Aruba y international, skirbi un berdad cu kisas ta haci hopi hende dolor no ta facil, tin biaha hasta hende muhe ta pone nan para keto un rato debi na e mentiranan cu ta keda treci padilanti. Cu e ta facil no, pero e pueblo merece informacion di calidad.
P’esey semper mi a keda kere firmemente den e dicho di defunto Jossy Mansur y cu semper mi ta carga esaki como liña pa recorda mi funcion y trabao. “BERDAD NO TA PERHUDICA NINGUN HENDE Y NINGUN NACION “ Aruba Pabien riba Dia Internacional di hende muhe.
Mi kier a mustra boso un poco di mi mundo durante aña y di tur e experencia y estudio cu mi a ricibi den e bunita trabao aki cu a crea mi di ta ken mi ta awe orguyosamente. Un mucha muhe simpel y humilde cu a nace na Dakota den un cas humilde, cu a experencia 2 horcamento den su bida, a lanta sin mama y sin tata, separa di su ruman y a lanta bao hala di mi wela basta streng te dia di awe cu mi por bisa orguyosamente di ken mi ta.
Como hende muhe mi metanan no a caba cu EA News. Tin mas sorpresa na caminda y nos lo sigui crece pa sigui duna un miho nivel di periodismo local y internacional pa informa e comunidad manera debe ser.
Pasa un dushi dia y mi ta spera boso por disfruta un poco di potretnan cu mi a acumula un poco di mi bida den MEDIO desde aña 1999.
Farrah Boekhoudt