Departamento di Mucha y Hoben tabata anfitrion:
November ta conoci pa ta e luna unda ta duna mas atencion y contenido na loke ta encera Derecho di Mucha na Aruba. P’esey mes e team dinamico di Codigo di Proteccion di Aruba; Sue Ann Ras, Coordinador Nacional CdP y kwartiermaker Departamento di Mucha y Hoben; Jullie-Ann Thode, lider di proyecto Enseñansa; Laura Rumahloine, lider di proyecto Salubridad y Efraim Suurendonk, lider di proyecto Social y Centronan di Cuido, a prepara un programa relevante y al caso relaciona cu e trayecto di Codigo di Proteccion na Aruba.
For di 2019 Gobierno di Aruba a cuminsa na desaroya e implementacion di Codigo di Proteccion y e iniciativa aki tabata parti di e Sociaal Crisis Plan. A traha un structura di trayecto cu e 4 ministerionan: Salubridad – Social – Husticia y Enseñansa y a traha riba un mihor colaboracion, structura y ehecucion di e casonan cu Bureau Sostenemi, como nos Advies en Meldpunt Kindermishandeling (AMK). Den cuadro di esaki a pidi UNICEF NL pa brinda sosten tecnico den fortalece y crea un “kind beschermingssysteem”na Aruba.
Na comienso di 2021 a bin cu contacto entre gobierno di Corsou, SOAW y UNICEF NL cu e mesun pregunta, pues pa nan tambe haya sosten tecnico, pa inicia nan trayecto di implementacion y desaroyo di un Codigo di Proteccion. Corsou a inicia e trayecto, adoptando e nomber cu Aruba a scoge, esta Codigo di Proteccion y no Meldcode, mirando e tremendo acogida positivo cu esaki a haya den region y Hulanda.
Dia 2 di november 2022 e team di Codigo di Proteccio Aruba a ricibi bishita di trabou di e delegacion di e team ‘Kodigo di Protekshon Korsou’, cu tabata consisti di: Sra. Miosotis Yearwood, Ministerio SOAW; Sra. Corinne Molis, Ministerio SOAW; Sra. Elly Hellings, landelijk coordinator “Kodigo di Protekshon”; Sra. Indra Melfor, Ministerio OWSC; Sr. Carlos Brazil, Ministerio OWSC; Sr. Erel Everitz, Ministerio SOAW; Sra. Naphtaly Boerleider, Ministerio GMN
E bishita laboral aki tabatin como meta:
- Intercambia conocemento y experiencia di Aruba su trayecto y desaroyo di CdP;
- “The do’s and don’t’s” y e experiencianan di e team di CdP di Aruba;
- Elabora riba e planificacion y e posibilidadnan di sosten for di DMH pa Corsou den henter e proceso di desaroyo y implementacion na Corsou;
- Comparti e informacionnan relevante relaciona cu e CdP su facetanan.
Den e parti di merdia por a conta cu participacion di algun Supervisor di Codigo for di diferente sector di Aruba, cu a brinda e delegacion di Corsou un bon splicacion di nan tarea como Supervisor di Codigo dentro di nan instancia/Departamento y kico mas lo sigui sosode den e proximo añanan. Tur esaki ta pa garantisa y salvaguardia un decreto nacional cu ta sumamente importante pa prevencion y bienestar general di nos muchanan na Aruba.
E team di Codigo di Proteccion ta sumamente contento y orguyoso cu nan logronan relaciona cu implementacion di CdP na Aruba. Y alabes ta sumamente satisfecho cu nos por a comparti e experiencia y conocemento cu e team di Corsou, cu ta inicia nan trayecto.
