Diamars mainta, un biahe di placer a bira un tragedia na e area di Mangel Halto, caminda un bishitante di nacionalidad Mericano a fayece tras di a enfrenta dificultad den lama.
E suceso a wordo reporta pa central di polis rond di 11:11 di mainta. Segun e prome informenan, e aviso a drenta via e personal di Wardacosta (AC), indicando cu un persona masculino tabata den problema den awa y no tabata reaccionando. Di biaha a despacha patruyanan di polis pa e sitio pa brinda asistencia.
Esfuersonan pa reanimacion
Na e sitio di e sucedido, a bin resulta cu e victima tabata snorkel hunto cu su casa. Na dado momento, e señora a ripara cu su casa no tabata reaccionando mas den e awa y mesora a bati alarma. Personanan cu tabata den cercania riba kayak a reacciona conhuntamente pa yuda saca e curpa y hib’e na canto.
Unabes riba tera firme, personanan cu tabata presente a cuminsa e procedura di reanimacion (CPR). Na yegada di e ambulance, e paramediconan a sigui cu e esfuersonan di resuscitacion y a haci nan maximo esfuerso pa stabilisa e homber, pero lamentablemente e curpa no a reacciona mas.
Confirmacion di fayecimento door di KPA
Dokter Voskuil a presenta na e sitio pa oficialmente constata morto di e turista masculino, identifica como un ciudadano Mericano di 56 aña di edad.
Pa motibo di e impacto emocional fuerte cu e incidente aki a causa riba e famia, Slachtofferhulp tambe a presenta na Mangel Halto. E departamento aki tin e tarea di duna e guia y sosten necesario na e sernan keri den e momentonan di duelo y shock aki.
Cuerpo Policial Aruba a emiti un comunicado caminda nan ta extende nan mas profundo condolencia na e famia di e fayecido den e momentonan dificil aki.