Riba djaluna 31 di mart e trabounan di reempaketamentu di desperdisio biomédiko ku nan a almasená riba tereno di Selibon a kuminsá. Ta ehekutá e trabounan akí bou di guia di e empresanan spesialisá RMD-Advies i Renewi.
Treinen pa empleado
Promé ku a kuminsá ku e trabou e empleadonan a haña treinen pa por prosesá e desperdisio na un manera seif i responsabel. A saka e desperdisio for di kònteinernan bieu i a empaketá nan di nobo den material adekuá pa transporte i prosesamentu. Seguidamente a pone esaki den kònteiner nobo pa transporte riba laman.
Kontròl pa loke ta trata presensia di bakteria
Durante di e reempaketamentu, bou di direkshon di GGD Boneiru a tuma diferente muestra di superfisie. For di e muestranan akí a resultá ku no tin bakteria ku ta kousa malesa presente den e desperdisio.
Transporte pa Hulanda a kuminsá
Riba djaluna 14 di aprel a transportá e promé sinku kònteinernan ku barku pa Hulanda. Einan ta prosesá nan den un instalashon di insinerashon aprobá ku ta adekuá pa kima desperdisio biomédiko.
Siguiente stapnan
Den e periodo binidero na e mesun manera ta reempaketá i transportá e stòk ku a sobra.
Reakshon di Kolegio Ehekutivo
Kolegio Ehekutivo ta kontentu ku a pone e paso importante akí pa loke ta trata prosesamentu responsabel di desperdisio biomédiko. Gobièrnu di Boneiru ta vigilá e proseso minusiosamente i ta enfatisá importansia di un transporte seif i bon pa medio ambiente.
