Despues di e instalacion di señor Dennis Martinus como diputado nobo na nomber di MPB den Colegio Ehecutivo di Bonaire, por informa cu e entrega di tareanan y dossiernan door di ex-diputado Joselito Statia a tuma luga na un manera ordena.
Señor Statia a repasa cu señor Martinus e tareanan relaciona cu e dossiernan actual y e estado di asuntonan denter di su cartera anterior, pa asina garantisa e continuidad di gobernacion. Statia a indica claramente cu e ta dispuesto pa sostene e diputado nobo cu conseho y apoyo den e periodo binidero.
Diputado Martinus lo continua, den e spirito di gobernacion confiabel y responsabel, e trabounan relevante denter di e cuadro stipula pa e coalicion UPB/MPB/Fraccion Serberie manera indica den e Mini-Programa di Gobernacion “Ordena | Stabilisa | Avanza” pa e periodo 2026–2027. E programa aki ta pone enfasis riba un gobernacion realistico y factibel pa e mandato cu ta resta te na e eleccion di Conseho Insular na maart 2027, cu prioridad riba finanzas na ordo, infrastructura, maneho di sushi, prosperidad amplio, otorgamento di permiso y mantencion di ley, ordo publico y siguridad, y bon gobernacion.
Diputado Martinus ta enfatisa cu e tareanan aki ta wordo carga di forma colegial. Gezaghebber y e diputadonan ta dedica nan mes hunto pa, denter di e periodo limita di gobernacion cu ta resta, trece structura, reconstrui confiansa y tuma accion concreto riba e asuntonan urgente cu comunidad di Bonaire ta confronta.
