Durante un seremonia militar riba djaluna dia 30 di yüni 2025, den oranan di mainta, trupa di ehérsito rotashon 48 a transferí su tareanan na e siguiente unidat, rotashon 49. E Komandante nobo, Mayor Marco Kamphorst, prosedente di Havelte, durante un traspaso tradishonal di rema, a tuma e komando di su predesesor, Teniente-Kolonel Kjell Koster.
Despues di kuater luna intensivo den Region Caribe, Teniente-Kolonel Koster ta mira atras ku orguyo riba e kolaborashon i ehersisionan di Trupa di Ingeniero11. “Pa e unidat tabata un chèns úniko pa trein i traha huntu ku CZMCARIB i sosionan lokal. Nos a siña hopi tokante kon operá den sirkunstansianan desafiante di Region Caribe. Durante nos rotashon nos por a traha na un forma maksimal riba nos habilidatnan di ingenieria i táktika. Kòrsou, Bonaire i Aruba a duna e pelotonnan di Ingeniero e posibilidat pa pone un bon fundeshi pa e habilidatnan general militar, pero tambe pa tópikonan spesialisá, tal manera Reparashon di daño na aeropuerto (Airfield Damage Repair), traha ku eksplosivo i téknikanan di ingenieria den kuadro di mobilidat i kontra-mobilidat. Banda di esei nos por a traha na preparashon propio, ademas nos a a traha tambe huntu i a trein ku Militarnan di Kòrsou, unidatnan di CZMCARIB i sosionan di seguridat lokal. Asina e militarnan di e Trupa di Ingeniero 11, a duna sosten na Sint Maarten en konekshon ku e kandela den prizòn. Esei nan a hasi den koperashon ku outoridatnan lokal na Sint Maarten i e Destakamentu di Marina na Sint Maarten. Tabata algu spesial pa mira kon nos, no opstante e diferensianan entre antesedente i métodonan pa traha, por a kontribuí huntu na siguridat i stabilidat. E periodo aki no solamente a reforsá nos kapasidat operashonal, pero tambe e lasonan ku nos sosionan den Region Caribe.”
Mayor Marco ta antisipá pa durante e 4 lunanan benidero ku su (BVE), Eskuadron di Rekonosementu di Brigada 43 (BVE), lo trein i traha den Region Caribe. E unidat ta wòrdu reforsá ku un peloton di ingeniero di rekonosementu di Batayon di Ingeniero Blindá 11 i un destakamento médiko di Trupa Médiko 43. Brigada di Eskuadron di Rekonosementu 43 por wòrdu desplegá multifunshonalmente dentro di e tres tareanan prinsipal di e forsanan armá, ta hasi tareanan di rekonosementu i vigilansia rònt mundu i por eliminá ophetivonan enemigu di rendimentu haltu, pa medio di apoyo di e ekipo di sosten ku kandela riba tera firme.
Nan ta hasi esaki ku kapasidat di rekonosementu riba tera, tantu den vehíkulo komo na pia, pero tambe nan ta hasi uso frekuente di sistemanan no tripulá i drone. Normalmente nan ta hasi esaki pa Brigada Mekanisá (Tim di Kombate di Brigada) 43, (Brigada Combat Team) di Havelte.
Awor e eskuadron di rekonosimentu ta haña e chèns i e oportunidat pa ehekutá nan tareanan den Region Caribe. Na promé lugá, pasobra nan ta trese kapasidatnan i rekursonan úniko, ku por ta di gran balor na momentu ku nan yudansa òf asistensia wòrdu pidí den e region. Na di dos lugá e ta un oportunidat úniko pa nan por trein y eksperimentá den e klima tropikal di Caribe. Mayor Marco ta ferwagt ku nan lo tin un periodo hopi interesante nan dilanti i ta spera ku nos lo por hasi di esaki un momento bunita y signifikativo huntu ku nos partnernan lokal.
Ehérsito Real di Hulanda tin un trupa permanente den Caribe. E unidat aki, bou di mando di CZMCARIB, por wòrdu desplegá pa un variedat di tarea. E trupa lo trein na Aruba, Boneiru i Kòrsou pa e próksimo kuater lunanan.
