Parlamentario Eduard Pieters (PPA) ta cuestiona pakico Gobierno no a ehecuta un decision di Parlamento
Pa parlamentario Eduard Pieters di Partido Patriotico di Aruba (PPA), e falta di bodycamnan pa cuerpo policial no ta solamente un problema operativo. Segun Pieters, e asunto ta revela un problema hopi mas serio: Gobierno no ta ehecuta e instruccionnan cu Parlamento mes a aproba unanimemente. Durante e programa di Enfoke, Pieters a recorda cu desde maart 2025 Parlamento a aproba un mocion unanime, pidiendo Gobierno pone fondo disponibel pa cuerpo policial por implementa e bodycam- y dashcamnan. E mocion a haya sosten di tur e fraccionnan den Parlamento. Sinembargo, mas di un aña despues, ainda no a implementa e proyecto.
Parlamento a papia, pero gobierno simpelmente no a actua
Segun Pieters, PPA no a keda solamente cu critica. Ora e presupuesto nacional no a inclui e fondo necesario, e partido a busca un solucion concreto.
Durante e debate presupuestario, PPA a presenta un amienda proponiendo cu e ingreso extra genera door di e proceso di legalisacion (pardonregeling), ta reserva specificamente pa financia e bodycam- y dashcamnan pa cuerpo policial.
Pa Pieters, e idea tabata simpel: uza ingreso extraordinario pa fortalece seguridad publico.
“E placa tabatin. E solucion tabatin. Loke no tabatin, tabata boluntad politico un biaha mas.”
Bishita na Cuerpo Policial
E parlamentario a relata cu despues di e mocion unamine, PPA a bishita cuerpo policial y a haya oportunidad di wak personalmente con e sistema di bodycam y dashcam ta funciona.
Segun e agentenan cu nan a papia cu ne, e tecnologia no solamente ta proteha ciudadano, sino tambe e polis mes. E bodycamnan por documenta e intervencionnan, evita conflicto tocante uzo di forza y aumenta confiansa den e investigacionnan. E dashcamnan, na otro banda, ta registra e persecucionnan, accidente y otro situacion operacional cu posteriormente por sirbi como evidencia y pa traha rapportnan mas confiabel. Pieters a bisa cu e beneficio ta cla, pero Gobierno no a sigui cu implementacion.
Un aña despues, ainda nada!
Segun e parlamentario, PPA a sigui haci e preguntanan na Gobierno tocante e estado di e proyecto. E contesta cu nan a ricibi tabata, cu e proyecto piloto lo a inicia na juli 2025 cuerpo policial lo haya bodycam. Pero e fecha a pasa y, segun Pieters, cuerpo policial ainda no a haya nada.
Pa e lider di fraccion di PPA, esaki ta un ehempel di un problema hopi mas grandi.
Mocionnan aproba unanimemente, ta keda sin ehecucion.
“Si Parlamento tuma un decision y Gobierno simpelmente no haci nada, e pregunta ta: E minister merece di keda como minister?”
Pieters a bisa cu e situacion no ta limita na e bodycamnan. Segun Pieters, diferente decision aproba den Parlamento ta sigui sin implementacion, debilitando e rol constitucional di e poder legislativo. E parlamentario a enfatisa cu Parlamento no por limita su funcion na djis aproba e mocionnan. Gobierno mester ehecuta nan tambe.
Pa Pieters, implementa e bodycamnan no ta solamente un inversion den tecnologia. Ta un inversion den transparencia, seguridad y confiansa entre polis y ciudadano.
Pero, mas importante ainda, e caso aki ta lanta un pregunta politico cu Gobierno ainda no a contesta: Si un decision unanime di Parlamento no ta ehecuta, con Gobierno ta demostra respet pa e institucion cu ta representa pueblo di Aruba?