Djabièrnè 1 di Òktober último den presensia di su direktiva kompleto i invitadonan, Sra. Desiree “Daisy” Coffie a presentá e movementu polítiko nobo Movementu 21, abreviá M21. Movementu 21, pasobra ela lanta den aña 2021 i ta prepará pa siglo 21, E “vuurtoren”, torno komo símbolo di direkshon, di guia i di kompas pa pueblo, hasta den tempunan turbulento. Ku un bos fuerte i determiná Daisy a tene su introdukshon, den kua ela menshoná entre otro inovashon, integridat, partisipashon, inklusividat, solidaridat, i renobashon polítiko. Konseptonan ku ela primintí di lo bai duna nifikashon ku akshonnan konkreto, pero ku djabièrnè no tabata e momento oportuno pa tira tur su balanan.
Daisy tabatin un spich hopi kla ku ta inspirá speransa i konfiansa. E tin basta aña komo miembro di Konseho Insular. Despues ku den un forma no elegante e mester a tuma despedida di partido MPB un aña pasá, ela bin ta funshoná komo miembro independiente den Konseho Insular. Den Konseho Insular Daisy Coffie a profilá ku hopi kritiká i kontribushon konstruktivo, pero tambe e tabata e bos pa mustra riba e maneho ku no tabata kana na interes di pueblo. Integridat den gobernashon tabatin su atenshon spesial. Semper respetando su koleganan ela mantené un nivel ku sigur a distinguié i ku a hasié diferente. Ku lantamentu di M21 e ke sigui duna e interesnan di e pueblo un bos. Na un manera determinante, ela mustra ku mester bai bèk mesa ku Hulanda pa logra ku e relashon ku Hulanda semper mester tin komo meta bienestar di e pueblo boneriano. E relashon aktual segun Daisy, no ta kumpli ku esakinan i e no ta satisfasé e pueblo. Na mesa ku Hulanda e diskushon mester ta: mehorá loke a bai bon den e último 11 añanan, korigí loke a bai robes i akordá puntonan ku no ta den e akuerdo aktual i ku meresé atenshon.
Segun Daisy a yega e ora pa nos komo pueblo kontestá e preguntanan kardinal i fundamental:Ken nos ta? Ken nos ta komo Boneriano? I kiko nos ke?
Ta importante pa nos kontestá e preguntanan aki. Pa mundu i pa otro. Nos lo subi huntu òf nos lo kai huntu komo un pueblo, asina Daisy a sigui trese dilanti. Si nos ta uní di bèrdat, ningun hende lo por tene ningun otro abou ni atras.
E lucha di e movementu lo ta pa sali na vanguardia di e pueblo, ku ta nifiká lucha na nòmber di sobrebibientenan di vários inhustisia, kontra probechadónan, kontra silensio inhustu, stigmatisashon, diskriminashon, desigualdat, etc.. Papiando ku hopi hende, Daisy ta konvensí ku e tempu ta apropiá, pasobra hopi ta preokupá pa e rumbo ku nos ta bayendo.
Den e tempu binidero lo bai mira e presensia di e movementu aki den tur skina aki na Boneiru i un yamada ta ser hasí na un i tur pa uni nan mes ku e movementu sin importá di kua religion bo ta, di ki desendensia bo ta bin, kua orientashon seksual bo a skohe o kua partido polítiko bo a vota pe. E movementu ta pa un i tur ku realmente no ke sigui para na banda mas i ke duna su aporte pa chikí ku e por ta pa hasi e diferensia. Pronto lo habri e oportunidat pa tur hende ku ta deseá bira miembro di M21, registrá nan mes i asina fortifiká e movementu. Huntu ku M21 nos ta bai ta E DIFERENSIA.
1 comment
[…] Source link […]