Unity Aruba Team, bao guia di Coach Dwaine Felida y su coaching staff, ta sigui haci un excelente impresion den e 16to Torneo Internacional di Baseball JMD na Punta Cana. Door di hopi dedicacion, disciplina y bon preparacion, tanto e equipo U10 como e equipo U8 a logra clasifica pa e cuarto final, cu lo hunga mañan mainta na 9:00am.
Ademas di e equipo di Unity Aruba, varios otro joven peloteronan Arubiano tambe ta representando nos isla cu hopi orgullo. CJ Roosberg y Shondrick Solognier ta competi cu Team Panama den categoria U12, mientras cu Cayden Fraser y Ray-Zion Jack ta haci un excelente papel cu Team di Merca den categoria U14. E team di Merca aki a logra clasifica pasa pe cuarto final, un logro cu ta confirma e alto nivel di talento cu Aruba tin den beisbol.
Mas cu gana of perde un partido, e torneo ta ofrece un experiencia unico pa e muchanan. Durante e evento nan tin e oportunidad pa hunga contra equipo di diferente pais, crea amistad internacional, conoce otro cultura y sinja con pa competi na un nivel mas halto.
Un di e aspectonan mas special di e torneo ta cu e hoben peloteronan por conoce personalmente ex hungadornan di MLB Omar Vazquez, scout reconoci Jose Fortuna y hopi otro scoutnan profesional, coachnan y lidernan di beisbol cu ta presente pa observa talento, comparti nan conocemento y inspira e proximo generacion di peloteronan.
Experiencianan manera esaki ta forma caracter, aumenta confiansa y motiva e muchanan pa sigui traha duro pa logra nan sonjonan. Aruba por sinti orguyo di e representacion cu su hoben atletanan ta mustra na escenario internacional.
Hopi suerte na tur e peloteronan Arubiano den e cuarto final. Aruba ta hunto cu boso!
