Local

E “caminda di cruz” si bo tin sintomanan di coronavirus


ORANJESTAD,Aruba

E “caminda di cruz” si bo tin sintomanan di coronavirus

Esaki ta e storia di e ciudadano Erika Chemaly, kende despues di a bolbe Aruba for di Miami, unda el a bay pa testnan medico, a hay’e den un caminda di cruz. Awe e ta conta tur loke el a pasa aden.

Mi a bay Miami pa bishita dokternan, mi a bay hospital- y clinicanan, mi a wordo expone na tur sorto di bacteria y virus den e luganan aki.

Mi a biaha bek pa Aruba riba diamars, Maart 17, 2020 y mi a yega 2:35 di atardi.

Riba mesun vuelo aki tabatin un persona cu tabatin e virus, no solamente mi a descubri esaki pero otro pasaheronan tambe a ripara esaki y mi tin prueba di esaki.

Nos a haci un apelacion riba oficialnan pa no laga e persona aki subi e avion pero asina mes e persona aki a wordo permiti pa subi avion y biaha hunto cu nos.

Ami tabatin un mascara bisti for di aeropuerto di Miami y tambe abordo di e avion y mi a kita e mascara dos bes durante di e vuelo, uno ora cu mi a come den e aeropuerto y e otro ocasion ora cu mi mester a bebe algo den e avion.

Nos a yega Aruba y nos temperatura a wordo controla pa mira sin nos tabatin keintura y despues nos a wordo dirigi pa firma un documento di DVG cu entre otro ta mustra cu nan lo contact nos pa medio di telefon pa bin controla nos na cas.

Mi persona a firma e document aki pero nunca a ricibi un yamada.

Diahuebs mainta mirando cu mi no a ricibi ningun yamada manera e documento ta señala, mi a dicidi di tuma contacto telefonico c’un persona kende tambe tabata riba e vuelo aki hunto cumi pa mira si dado caso e lo por a wordo yama.

E persona aki si a ricibi un yamada y a wordo duna un fecha pa wordo controla y obviamente mi persona inmediatamente a tuma contacto cu DVG y a informa nan di mi situacion caminda mi a bishita hospital- y clinicanan na Miami y cu henter e saunto di un pasahero infecta riba e avion y mi a bisa nan cu mi tin e sintomanan pero cu mi no ta sigur si esakinan ta e sintomanan concerni pa por bisa cu nan por ta di e virus of di un griep of verkoud.

E ora nan a bisa mi cu ya cu mi a drenta y Sali di hospital- y clinicanan y cu mi tabata rib e avion, mi mester wordo someti na un tes pa motibo cu mi tin e sintomanan. Na a bisami pa bin haci e test diahuebs merdia 1’or, loke mi a haci tambe y mi a wordo informa cu lo mi ricibi e testnan dentro di un periodo di 48 ora.

Esaki pa mi tabata straño ya cu e otro pasahero a wordo informa cu e lo scucha bek di nan den un periodo di 30 ora.

Den mi prome post cu mi a somete mi a expresa cu mi no tabatin sintomanan, no pasobra mi no tabatin esakinan pero mi tabata tratando di evita cu mi famia- y amigonan wordo alarma mas ainda pa loke ta mi situacion di salud y cu mi no tabata sa sigur si e sintomanan ta pertenece na e virus of no.

Mi a expresa mi gratitud na DVG pa nan reaccion rapido, aunke ta mi persona a tuma contacto cu nan finalmente y esey no tabata loke mi a firma pe den e document cu nan a duna nos ora cu nos a yega Aruba.

Despues di esey mi a sinta warda cu tur pasenshi pa e resultado cual lo mester a wordo duna na mi diasabra merdia pa 1’or pero esaki no a sosode.

Mi a wordo yama diasabra mainta y a wordo puntra con mi sintomanan ta y si nan a bira pio y mi a informa nan cu si y nan a bisa mi cu mi tin cu warda pa mi resultadonan pa motibo cu na e momentonan ey, nan no tabata mucho cla y cu esey por ta un indicacion cu e resultado por ta un negativo falso.

Obviamente no a spanta pero asina mes mi a warda te cu 2’or di merdia ya cu nan a mi a wordo bisa cu nan lo tuma contacto cu mi persona e ora ey.

Mi no a ricibi e yamada y mi mes a bolbe cuminsa yama atrobe y a papia c’un dama sumamente amical kende a informa mi cu mi lo wordo yama banda di 5’or di atardi of algo despues ya cu nan tabata sumamente ocupa y cu mi test no tabata cla ainda.

Mi a puntra cu si mi test no tabata asina sigur for di comienso y cu e ta un negativo falso cu su mi mester pasa un test mas pero e dama aki a bisa mi cu esey no ta algo cu e por duna mi conteta riba dje.

Mi a tuma contacto c’un persona cu ta cerca di management y nan a logra di tuma contacto cu mi persona den henter e situacion caotico aki na mes momento cu e conferencia di prensa di ayera diasabra anochi tabata tumando luga y di repente nan ta informa mi cu mi test a resulta negativo despues cu esaki no tabata totalmente bon y mi a bolbe expresa na nan cu nan tin cu test mi atrobe pero mi a wordo informa cu no tin suficiente test pa haci esaki.

Ta mas cu claro cu esaki ta hopi alarmante pa motibo cu mi no tin un contesta sigur y mi sintomanan tabata birando pio y mi tabata kier a sa kico ta pasando.

Diasabra anochi, cu tur e stress aki, mo a haya un ataca di tosamento y mi a dicidi di tuma un baño y despues sosega ya cu henter e asunto aki a cuminsa afecta mi mas cu e tabata haci mi sinti bon.

Diadomingo mainta mi a bolbe yama e dama amabel y el a informa mi cu pa 10’or di mainta un otro persona lo tuma contacto cumi y esaki no a sosode y e ora mi a bolbe dicidi di bel pa mira kico ta pasando.

Mi a wordo atendi pa un homber sumamente bruto kende a contesta mi den forma grosero, a tratami masha grosero mes y hasta a cera e telefon den mi orea.

Mi a dicidi di bel un otro number y a entrega un keho contra di e trato aki pero mi a wordo informa cu pa 10.30 lo mi wordo yama bek y te cu 11’or di mainta mi no a ricibi ningun yamada.

Pa 11.02 mi a ricibi un yamada di e persona kende mester a yama 10’or di mainta y el a ofrece su disculpa pa esaki ya cu e tabata buscando e informacionnan pami.

Mi a expresa na e dama amabel aki cu mi ta agradecido cu nan a tuma e test pami y cu nan tabata sumamente cauteloso inicialmente pero e fomra con cosnan tabata bayendo, ta un bruhacion completo y cu ta confundi hende hopi. Sigur ora cu mi persona constantemente tabata esun tras di nan pa re resultado y esey no ta algo corecto.

Mi ta compronde cu nan tin un ekipo chikito y tambe ta compronde cu nan ta bou di presion y hopi ocupa pero si un hende ta dicidi di bay haci algo y duna servicio na comunidad, e tin cu wordo haci bon, no den un forma mediocre, specialmente si esaki ta regarda hende su salud.
Awor e pregunta ta keda, ki ora mi persona por haci e test di nobo cu por ta un falso negativo, y e dama a bisa mi cu nan no por haci esaki, cu mi tin cu warda y cu nan lo tuma contacto cu mi dokter di cas pa mira cual tratamento mi tin cu ricibi.
Si e sintomanan sigui bira pio, mi a wrodo informa cu e dokter di cas lo sa kico pa haci.
Mi a pidi pa ricibi e testnan cu mi a haci si nan por wordo manda pa mi y mi a wordo informa cu mi tin derecho pa ricibi esakinan y cu sigur esaki lo wordo manda pa mi dokter di cas.
Mi a sigui insisti cu mi kier wordo getest di nobo y mi a wordo informa cu esaki no ta posibel na e momentonan aki.
Obviamente esaki ta laga un sabor sumamente amargo atras, c’un sentimento hopi angustioso pa motibo cu mi no ta realmente sigur cu e resultado cu mi a haya y e situacion aki ta hopi alarmante pa mi persona y mi famia.
E pregunta ta keda… di con mi a wordo yama mainta pa puntra con mi sintomanan ta y wordo bisa cu mi resultado no tabata sigur… pa despues mi wordo bisa cu nan ta negativo?…
Mi ta supone cu mi tin cu bira mas malo….. prome cu mi conoce e berdad……

Related posts

“ARUBA ONE HAPPY ISLAND LIONS CLUB CU DRIVE THRU DONATION DROP OFF”

EA News Author

Ruthy”Lady Ruth”Vrieswijk-Bergen: Sabiduria den nos Alegria

EA News Author

Recherche di San Nicolas a detene 5 persona y a confisca entre otro droga y uniformnan di polis

EA News Author

Leave a Comment