Tras di porta cera na Nacionnan Uni, e berdad di historia tabata wordo cuestiona. Bonaire Human Rights Organization (BHRO), Miembro Asociá di CARICOM Reparations Commission, a testigua directamente e negociacionnan aki, caminda Estadonan Miembro a debati si e sclavitud transatlantico di personanan Africano mester wordo reconoci como e crimen mas grave contra humanidad.
BHRO a participa como observador den seis consultanan informal, teni for di 5 te cu 16 di maart 2026, riba e resolucion preliminar lidera pa Ghana den colaboracion cu Estadonan Miembro di Nacionnan Uni. E termino “mas grave” a bira un punto di debate intenso—mustrando divisionnan profundo, caminda hopi estado finalmente a abstene for di e votacion final.
Riba 25 di maart den Asamblea General —marcando Dia Internacional di Comemoracion di e Trafico Transatlantico di Esclavo—James Finies y Davika Bissessar Shaw tabata testigo ora Estadonan Miembro a vota riba e resolucion historico cu ta declara e traficacion di esclavo transatlantico y sclavitud (den cual personanan Africano tabata wordo trata como propiedad) como e “crimen mas grave contra humanidad.” Esaki a sosode apesar di fuerte resistencia durante negociacionnan di varios pais, incluyendo Hulanda y otro potencianan colonial Europeo anterior, cu a purba di suavisa e formulacion y sconde e berdad completo di e parti mas scur di historia mundial.
Sinembargo, Ghana, hunto cu Estadonan Africano y nacionnan di Caribe—incluyendo Barbados, Antigua y Barbuda, Saint Kitts y Nevis, y Bahamas, entre otro, como co-patrosinado di e resolucion—a keda firme. Sin logra consenso, nan a nenga di retira of compromete e texto y a trece e asunto dilanti di Asamblea General, permitiendo comunidad internacional dicidi di manera democratico via votacion.
E resolucion finalmente a wordo adopta, marcando un paso crucial pa berdad, responsabilidad y husticia reparatorio. E resultado di e votacion a mustra un posicion global cla: 123 Estado Miembro a vota na fabor, 3 a vota contra, y 52 a abstene—principalmente paisnan di Union Europeo, incluyendo Hulanda, kendenan no a sostene e resolucion. E posicion aki ta debilita e credibilidad y sinceridad di e disculpa Hulandes, haciendo esaki efectivamente sin balor, y ta fungi como un ehemper evidente di hipocresia riba e escenario mundial.
Mas laat e anochi ey, e delegacion di BHRO a atende un recepcion priva na Marriott Marquis Hotel na Manhattan, riba invitacion di e Presidente di Ghana, John Dramani Mahama. Durante e cena aki, e Presidente a refleha riba e origen di e resolucion y a comparti su experencianan personal. E momento aki a subraya e importancia di Bonaire y BHRO den e esfuersonan global continuo pa berdad y husticia