Ultimo periodo Wardakosta a ehersé diferente patruya di kòntròl riba laman. E kòntròlnan akí tabata dirigí riba kontrol di charternan ilegal, komportashon peligroso di seadoo nan i kontrol di dokumentonan di nabegashon balido na bordo. Durante e kontrolnan a duna un total di 39 prosèsverbal pa motibu di diferente infrakshon di botonan.
E patruyanan akí ta ser realisá konhuntamente ku ‘Havenveiligsheidsinspectie’, Kuerpo Polisial di Kòrsou i Duana. Durante e siguiente kontrolnan ku lo ser ehekutá Wardakosta lo bai kontrolá mas severo i lo duna but na momento ku un persona no tene su mes na e leinan vigente. Den kaso ku ta nesesario lo pone beslag riba e boto òf seadoo. Wardakosta ta pidi tur persona pa mantené nan mes na regla i soru pabo tin bo dokumentonan di nabegashon huntu kubo.
Wardakosta ta konsehá tur doño di boto pa laga hasi mantenshon frekuentemente na nan boto. Sòru pa bo tin sufisiente medionan di seguridat i ekipo di reskate na bordo, tal manera: salbabida, flèshlait, kaha di promé asistensha (EHBO), sufisiente awa, aparato pa paga kandela, radio VHF òf telefon selular ku bateria kargá. Evitá ku bo boto ta daña na kaminda i kubo tin un situashon peligroso riba laman ku bo boto i bo pasaheronan. Den kaso ku bo mester di yudansa, bo por yama Wardakosta riba e number 913 òf whatsapp 510 0913.
