Apesar di un reduccion global den casonan di Zika desde 2017, e circulacion di e virus transmiti pa sangura a ser confirma den 89 pais rond mundo. Aunke e cantidad di hende cu a cay ta keda abou, a constata un aumento sporadico den algun pais den ultimo añanan.
E EPI-WIN webinar: Zika virus: : siña for di pasado, prepara pa futuro, a reuni cu expertonan e siman aki pa discuti e situacion global di Zika, y tambe medidanan pa rastrea su transmision pa preparacion y reaccion tempran.
Mayoria di e infeccionnan cu e virus aki ta asintomatico of leve, loke ta haci cu deteccion di e maleza door di e sistemanan di cuido di salud ta hopi dificil”, María Van Kerkhove, Hefe di e Unidad di Maleza Emergente y Zoonosis na e Organizacion Mundial di Salud (OMS), a bisa. Pa loke ta trata e complicacionnan di e maleza, OMS a adverti tambe cu muher na estado ta particularmente vulnerabel na e efecto di e maleza, ya cu e maleza por conduci na mal formacion congenito, manera microcefalia, y tambe na un probabilidad mas halto di parto prematuro of aborto espontaneo.
Situacion den e region di America y medidanan di control
For di su prome deteccion na Brazil na Maart 2015, a confirma transmision local di Zika den tur pais y teritorio di America, cu excepcion di Chile continental, Uruguay y Canada. Diez pais ta conta pa 89% di e casonan di Zika registra entre 2014 y 2023, cu Brazil, Colombia y Venezuela cu ta na prome lugar.
Datonan di e Organizacion Panamericano di Salud (OPS/PAHO) ta mustra cu, contrario cu otro virus manera dengue of chikungunya, cu a causa mas cu 3 miyon y 324,000 caso respectivamente te cu awor na 2023, Zika ta mustra un incidencia significativamente mas abou, cu solamente 27,000 caso durante e mesun periodo. Ta esencial pa pone vigilancia riba e infeccionnan agudo di Zika y e manifestacion di otro sindromenan neurologico manera Guillain-Barre, ‘ Thais dos Santos, Consehero riba Vigilancia y Control di Maleza Arboviral Neglisha na PAHO a bisa. “Si nos optimaliza e acercamento aki, nos lo ta mihor prepara pa compronde e maleza completamente y tuma medidanan preventivo”, el’a agrega.
Mantene un nivel adecua di monitor ta crucial pa preveni epidemia den futuro”, dos Santos a bisa, enfatizando e importancia di tin e diagnostico exacto i abundante den laboratorionan, tambe entrenamento di personal di cuido den salud na tur nivel y den tur fase di e maleza. “Esaki lo permiti e deteccion na tempo di Zika y, na su turno, e implementacion di medidanan relevante di control y efectivo”, e experto di PAHO a bisa.
Na maart 2022, WHO/OMS a lanza e Global Arbovirus Initiative, cu tin como meta pa atende cu virusnan cu ta bini di sangura, musca y cu potencia pa epidemia y pandemia. Pa medio di e iniciativa aki, nos tin como meta pa desaroya guia pa vigilancia, maneho clinico y siguimento di complicacionnan di Zika, y tambe pa fortalece vigilancia di medio ambiente y control. Comunicacion di riesgo, investigacion di salud publico y colaboracion entre actornan clave ta elementonan central den e esfuerzonan aki”, Dr. Van Kerkhove a bisa.