Zr.Ms. Groningen a tuma e tarea komo e barku stashoná den Region Karibe ofer di Zr.Ms. Holland. E barku patruyero awe mainta a mara na Bahia di Santa Ana na Willemstad. E lunanan benidero e barku lo ta aktivo den operashonnan anti-droga; banda di esei tambe e lo para kla pa wòrdu desplegá suministrando yudansa di emergensia.
Marina Real tin 4 barku patruyero di e asina yamá kategoria ‘Holland-klasse’. E OPV nan aki (barkunan Patruyero ku ta subi oséano) ta embarkashonnan ku despliegue fleksibel pa vigilansha di awanan kostero. E barku stashoná ta traha riba awanan internashonal, konhunto ku Wardakosta Merikano, i serka di kosta ku Wardakosta Region Karibe. E NH90, helikòpter di kombate marítimo, a bolbe sali na bordo di e barku, pa sostené e barku den opeashonnan for di laira.Zr.Ms. Holland a yega su haf di origen ku ta Den Helder, na final di desèmber. E delaster lunanan e barku a interseptá un total di por lo menos 9000 kilo di kokaina den Region Karibe.
Ku e presensia di un barku stashoná den region, Defensa ta kontribuí na pas i seguridat den Region karibe.
