Oficialmente comienso di e estudio pa bira polis di 2 aña pa 11
agente aspirante di Cuerpo Policial Hulanda Caribense(KPCN) y 7 agente aspirante di Cuerpo Policial
Sint Maarten(KPSM). Durante un ceremonia na warda di polis na Philipsburg, e minister di husticia di
Sint Maarten, Mr. Nathalie Tackling, e coordinado di academia di polis den e area di Caribe, sr. Jan-
Willem Ruts, hefe di KPCN, sr. Alwyn Braaf y e hefe di KPSM, sr. Carl John, a hiba palabra.
E oradonan durante nan discurso a enfatisa e importancia di e profesion cu e aspirantenan a scoge
p’e y a recorda e aspirante nan cu e profesion di polis ta hancra den duna servicio na comunidad. Nan a enfatisa integridad como un balor fundamental cu mester mantene den nan rol den futuro.
A enkurasha e aspirante nan pa keda firme den nan compromiso pa proteha y sirbi cu honor i
dedicacion. Na e ceremonia tambe tabata presente e team di maneho di KPSM, hefe di e departamento operacional di KPCN, sr. Clark Mercera, coordinado di estudio pa KPCN, sr. Rouel Pinedo y e docentenan y guiadonan di practica cu lo guia y sostene e studiantenan durante e estudio na Sint Maarten.
Durante e proximo dos aña, e aspirante nan nobo lo sigui un estudio intensivo bou di responsabilidad di Academia di Polis di Hulanda, di cua nan lo cera conoci cu diferente aspecto di e trabou di polis, manera supervision, investigacion di delito y con pa brinda yudansa den caso di emergencia. E 11 aspirantenan nobo pa Hulanda Caribense lo sigui e parti teoretico di e estudio na Sint Maarten y e experencia practico na Boneiro. Na final di e estudio, e aspirante nan aki lo tin un diploma di polis riba nivel MBO-4, despues di cua por desplega nan completamente riba Boneiro, Sint Eustatius y Saba.
Cuerpo Policial Hulanda Caribense ta desea e aspirante nan pa polis tur clase di exito cu e estudio.
