Outor Giovanni Gijsbertha a repartí riba djarason i djaweps tras di
lomba alrededor di 600 ehemplar di e buki pa mucha E misterio di maskarada na tur dies skol
primario i institushon di enseñansa na Boneiru. Tur alumno di grupo 7 i 8 a risibí un buki grátis
tokante tradishon di maskarada na Boneiru.
E repartishon a haña un balor spesial debí ku Gijsbertha tabata kompañá pa Cliff Frans, kende a
fungi komo inspirashon pa e buki. Huntu nan a bishitá tur skol pa entregá e bukinan
personalmente na alumnonan.
Danki na kolaborashon di e proyekto Edukashon Kultural Artistiko di Kalidat, ku ta enfoká riba
enseñansa kultural na Boneiru, e buki a bira un realidat. E buki ta konektá ku mundu di
eksperensia di mucha i ta eksponé nan na herensia kultural.
Maskarada ta un tradishon úniko i balioso ku rais profundo den kultura Boneriano. E ta un parti
importante di identidat di nos isla. Ku E misterio di maskarada, e tradishon ta wordu pasá na un
manera aksesibel i interesante na e siguiente generashon. Pa medio di kuenta ta yuda e mucha
komprondé i apresiá su propio kultura.
Partimentu di e buki na skol ta kontinuashon di presentashon ofisial riba djasabra 2 di yanüari
na kas di Chon Theodora. Esaki ta kaminda maskarada ta kaba tradishonalmente.
Ku e akshon aki, tur alumno di grupo 7 i 8 na Boneiru a haña e oportunidat pa deskubrí i
fortalesé nan propio kultura pa medio di literatura.
