ORANJESTAD,Aruba
Parlamentario Endy Croes ta felicita Gabinete Wever Croes y henter pueblo di Aruba cu e hecho cu diaranson mainta Parlamento den su totalidad den un forma unanime a aproba e Ley di Umbudsman esta e ley di Defensor di Pueblo.
/// Zulay van Poppel x Parlamentario di MEP a inicia esaki desde 2004/2005:
Initiativa di e Ley di ombudsman a cuminsa desde aña 2004-2005. X Parlamentario di MEP Sra Zulay van Poppel a cuminsa cu e movecion pa bin cu un ley di ombudsman esta defensor di pueblo. Na 2009 Evelyn Wever Croes a tuma e initiativa over pa trata na cristalisa e ley aki pero lamentablemente no a haña cooperacion ni sosten di Gobierno anterior pa por a termina esaki. Na 2015 tabata tin otro intento mas e tempo aya pero sin por a duna resultado como cu no tabata ricibi e cooperacion nesesario di Mike Eman. Pues pa Mike Eman y AVP aparentemente e ley aki no lo tabata tin prioridad.
/// Den programa di partido MEP y den acuerdo di gobernacion esaki ta ancra:
MEP a pone den su programa cu el a bay elecion cune cu Ombudsman ta keda un prioridad y lo percura pa esaki bira realidad unaves den gobierno. A percura pa ancra esaki riba pagina 6 di e acuerdo di gobernacion cual a wordo firma 17 di October 2017. Desde cu a drenta gobierno e bijzondere commissie den Parlamento presidi pa Ady Thijsen a reuni na varios oportunidad cu e kwartiermaker y DWJZ y asina a percura pa Directie Wetgeving en Juridische Zaken ( DWJZ) hasi e cambionan nesesario y proponi door di dicho comision den Parlamento y expertonan riba e tereno. Hunto a logra finalmente un producto cual a carga e sosten diaranson ultimo momento cu e ley aki a wordo aproba unanimamente.
/// Kiko ta tarea di ombudsman?
Ombudsman ta Defensor di Pueblo. Pues lo bin un institucion independiente y imparcial unda pueblo, por ehempel e homber chiquito, kende kisas no por paga un abogado tin e oportunidad di entrega su keho contra gobierno, instancianan semi gubernamental of priva contra cualkier inhusticia momento e sinti su mes perhudica of cu su derechonan no a wordo respeta. Pues e Defensor di Pueblo ( Ombudsman) lo brinda protecion na pueblo y lo defende e interes di e cuidadano. Defensor di Pueblo lo mester entreotro supervisa e calidad di servicionan publico den un pais. Defensor di Pueblo lo juda pueblo hasiendo investigacion riba kehonan entrega y lo denucia esakinan. Awor cu e ley aki a keda aproba nos lo bay percura pa mas pronto posibel cana e caminda pa e Bureau aki esta e institucion independiente aki wordo lanta y por bay den operacion canando e caminda corecto di e Ley pa cu e nombracion di persona(nan) integro cu lo mester bay ocupa funcionnan akiden. Den ley ta stipula cu lo mester 2/3 parti di voto den Parlamento pa nombra e persona cu lo bira e Ombudsman. Fondonan pa e Institucion aki ta incorpora caba den presupuesto 2020 y ta cuestion di pone man na obra pa por tin e Institucion aki up and running promer cu fin di aña. Pabien Gabinete Wever Croes, Pabien na tur esnan cu a traha riba e Ley aki, danki na tur esnan cu a brinda nan conseho y pabien na Parlamento cu a aproba esaki y sigur pabien na e comunidad di Aruba cu nan Defensor di Pueblo.