Willemstad- Ku plaser Calmes a tuma nota den prensa ku un bakuna kontra di COVID-19 a wòrdu desaroyá. Resientemente e tèstnan nesesario a tuma lugá i aparentemente e efektividat dje bakuna aki ta 90%. Aparentemente Hulanda a keda di hasi e “bestelling” dje bakuna pa tur pais i islanan den Reino for di un distribuidor na Bèlgika.
Entre tantu nos a tende Minister di Aruba duna informashon i su espektativanan. Pa Calmes nos Minister di Salubridat mester kuminsá sali i duna informashon riba kuantu bakuna Kòrsou ta bai risibí i pa ku kua temporada. No por laga tur kos den man di un ámtenar esta dòkter Gerstenbluth. Dunando informashon Kòrsou por kuminsá prepará pa ora e bakuna yega esaki no bira un “free for all”.
Antisipando yegada dje bakuna Calmes a dirigí un karta pe Minister konserní puntrando ku tin un plan di bakunashon i si ta bai kuminsá e proseso di bakuná e aña aki mes. Ta importante pa publiká si tur hende tin ku bakuna si òf no. Tambe Calmes kier sa si tin un lista di prioridat. Ken ta bakuna promé?; esnan positivo, esnan ku ta trata e pashèntnan i despues nos penshonadonan? Calmes a pidi informashon pa sa unda e bakunashon lo tuma lugá, kon pueblo lo wòrdu aserka i si ilegalnan tambe ta bai wòrdu bakuná. Primordial ta pa garantisá ku tur preparashon ta wòrdu hasi i komuniká ku pueblo pe bakunashon kana bon.
