Politica

Gobierno di Aruba tin tur atencion pa e situacion di Corona Virus y no tin necesidad pa panico


ORANJESTAD,Aruba

Despues cu diabierna ultimo World Health Organization, oficialmente a bisa cu mester pone mas atencion riba Corono Virus y declara esaki emergencia mundial, gobierno di Aruba a sigui pone tur atencion riba e virus aki. Diadomingo den un conferencia di prensa extra ordinario tanto Minister encarga cu Salubridad Sr. Dangui Oduber como Minister di Husticia mr. Andin Bikker a bini hunto pa splica kico tur gobierno ta haciendo. Na momento cu a bira conoci cu e virus aki ta spread hopi lihe gobierno mesora a activa tur departamento concerni. Ta trata di stakeholder, crisis team y diariamente ta reuni pa cuminsa haci e preparacionnan necesario pa pais Aruba  ta mas miho prepara posibel. E conferencia ta pa informa riba e medidanan di precaucion cu a tuma como pais y informa comunidad den cuadro di transparencia riba yegada di algun pasahero for di China. E pasaheronan aki ta residente di Aruba cu a bay pasa dia di vakantie relaciona cu Aña nobo Chines na China. Te na e momento aki no tin ningun caso di e virus aki na Aruba, pero momento cu e personanan aki yega Aruba ya caba tin medida di pre-caucion. Lo tuma tur e pasonan necesario pa ta bon prepara. Hospital ya caba tin su camber di isolacion cu por tuma un gran cantidad di pashent den caso cu tin indicacion cu nan por tin e virus. Tambe tin area pa cuarentena manera tin otro caminda di mundo pa evita cu e virus por sigui spread. Departamento di Salud Publico ta den bon contacto cu specialistanan y Asociacion di dokternan di cas unda a splica nan tur kico haci si nan haya un persona cu e virus. E personanan cu ta yegando Aruba for di China prome cu na baha for di avion Departamento di Salud Publico lo haci un control preventivo unda lo check nan prome nan baha for di avion. E pasaheronan aki lo ser pone den cuarentena pa dos siman pa di e forma aki controla e situacion. Minister Oduber a bisa cu e personanan no ta bin for di e area na China unda e Corona Virus a sali y no mester crea panico. Minister Bikker a bisa cu e personanan cu ta biniendo Aruba diadomingo atardi ta riba un vuelo for di Hulanda. E pasaheronan aki a sali for di China y for di e area cu no tin indicacion cu tin e virus aki y los di esey China mes ta tumando varios paso prome cu e personanan bandona e pais. Si personanan cu kier bin bishita Aruba como turista nan mester di un Visa y den deliberacion cu ATA ta un averahe di 30 persona Chines sa bin pa luna. Entre tanto mayoria di e avionnan cu ta bula pa China cu vuelo diario, mayoria di nan a limita nan vuelonan. Merca tambe a bin cu un tipo di restriccion pa biaha for di China. Minister Bikker a bisa cu ta evaluando kico ta bay haci basa riba consehonan cu a haya cu ta medida di articulo 7 inciso 3 di toelatingsbesluit cu den pasado a emiti ora tin caso di virus similar cu mundo a confronta cu’e. Aruba no tin vuelo director for di China, otro paisnan cu nan ta pasa di transito tambe ta tene nan control y China mes ta tene su control. E risico pa Aruba ta keda hopi chikito. Aruba como un pais turistico ta keda vigila esaki hopi di cerca pero como gobierno kier garantisa cu no mester bay over na panico pasobra e situacion ta bou control.

Related posts

Minister Rocco Tjon: A reuni cu fundacion autismo Aruba (FAA) y a presenta plannan pa 2022

EA News Author

Transporte publico mester mehora

EA News Author

Lider di Fraccion di MEP drs. Shailiny Tromp-Lee: “Mi ta honra di un biaha mas por ta un representante di pueblo

EA News Author

Leave a Comment