PoliticaFeatured

Durante tratamento di Presupuesto 2024: Minister Maduro ta splica e ciclo di recuperacion na Aruba den cual tin cu fortifica finansa publico pa por brinda alivio

Minfic 3

Siman pasa Parlamento di Aruba a trata y a aproba e Presupuesto pa aña 2024. Durante e tratamento di e presupuesto hopi Parlamentario tabata puntra si awo cu Aruba ta recupera, ki dia Pueblo tambe por ripara y sinti e recuperacion eynan den nan cartera. Minister Maduro di Finansa a splica cu e recuperacion di e economia y finansa di Aruba despues di e pandemia ta sosode den un ciclo di recuperacion cu ta consisti di cuater fase cu ta duna nan propio señal na Pueblo. Pa por duna alivio, prome tin cu fortifica e finansa publico na nos Pais, ya cu esey ta e paso den e ciclo di recuperacion di Aruba cu ta bin prome cu por brinda alivio na Pueblo.

Prome señal: turismo creciente

E mandatario di Finansa a splica cu e prome señal di recuperacion por mira den cifra di turismo. Asina por mira tur noticia di  Minister di Turismo, ATA, AHATA y AAA cu ta indica cu turismo ta creciendo y hunto cune e REVPAR ta bira mas halto y yegada di turista cu ta kibra record na nos aeropuerto. 

Di dos señal: crecemento economico

Den su splicacion na Parlamento Minister Maduro a indica cu e di dos señal di recuperacion na Aruba ta bin di crecemento economico. Pronosticonan di Departamento Economico, Banco Central y Fondo Monetario Internacional IMF ta mustra un crecemento economico basa riba dos ‘digits,’ esta un crecemento economico mas halto cu 10% di nos GDP pa Aruba den aña 2023. Esaki por a wordo spera ya cu turismo ta e motor di Aruba su economia, y si turismo ta bay bon, esaki ta lora economia di nos Pais. 

Di tres señal: mehoracion finansa publico

Minister Maduro a sigui splica cu e di tres señal di recuperacion, ta bira visibel ora e finansa publico di Aruba cuminsa mehora debi cu turismo ta creciente, economia ta florece y Gobierno ta aplica disciplina presupuestario. Aruba pa hopi tempo a conoce deficitnan grandi den presupuesto pa cual a traha debe grandi pa por yena e buraco aki den nos finansa publico. Na fin di aña 2017 a trece un cambio den e maneho di finansa publico na Aruba y apesar cu e pandemia a trece cune un reto mas grandi financieriamente, toch Gabinete Wever-Croes a tene su mes na un disciplina presupuestario cu awe a produci surplus den Presupuestonan 2023 y 2024 di Pais Aruba.

E di cuater señal: brinda alivio structural

Na momento cu como Pais bo ta fortifica bo finansa publico, bo por bay over na brinda alivio na Pueblo. Minister Maduro a splica Parlamento cu locual ta wordo haci na e monentonan aki ta pa fortifica e finansa publico na Aruba pa asina por traha un fundeshi fuerte pa por brinda alivio na Pueblo na un forma structural. E mandatario a splica cu pa hopi tempo na Aruba tabata tin e situacion na unda di un manera ad hoc ta brinda alivio. Tin biaha djies cu e meta pa gana eleccion y no pa duna un alivio permanente. E Minister a splica cu desde aña 2019, Gabinete Wever-Croes ta haciendo cambionan fiscal den cual ta percura pa por trece alivio na Pueblo den un forma structural y no ad hoc. E mandatario a termina su splicacion bisando: “Mehoracion den finansa publico, traha cu surplus den presupuesto, ta locual ta bay brinda espacio fiscal pa asina por duna Pueblo alivio na un forma structural den aña 2025.”

Related posts

HOH y team di UMC un bes mas cu opcion pa transplante di riñon

EA News Author

Tourism Corporation Bonaire a yama bon bini na diferente medionan di komunikashon na Boneiru

EA News Author

Tremendo workshop di Conect before content na IDEA

EA News Author

Leave a Comment

Whatsapp Message