Minister di cultura a bishita algun museo cu ta pertence na e red cultural di el banco de la Republica de Colombia

Cu ta sigura acceso liber na arte y cultura na e pueblo colombiano

Ta explora posibilidad pa financia acceso liber na arte y cultura na Aruba

Recientemente Minister Maduro tabata na Bogota riba invitacion di Embahador di Reino Hulandes na Colombia pa haci apertura di e exposicion ”20 Objetos: Una Historia de Aruba y Curazao”, cu a tuma luga na Biblioteca Luis Ángel Arango. E mandatario a haci uzo di e oportunidad pa bishita algun museo cu hunto cu e Biblioteca Luis Ángel Arango ta forma parti di e red cultural di Banco de la Republica. Minister Maduro a bishita Museo di Oro y tambe e Museo di Arte Miguel Urrutia MAMU den cual tin e Museo di Botero y e exposicion ‘Sanaduria, mediaciones para tejer sentidos plurales de la paz’, cu ta un exposicion di e Centro de Pensamiento Pluralizar la paz di Universidad Nacional di Colombia.  Na Colombia e acceso na arte y cultura ta ancra den e Constitucion y Banco de La Republica, cu ta e banco central di Colombia, ta percura pa e acceso aki atraves di nan red di biblioteca y museo. Minister Maduro a haci un bishita pa asina explora e posibilidad pa organisa y sigura e acceso na arte y cultura na Aruba na un miho manera.

Na cada museo Minister Maduro a wordo cordialmente ricibi y a haya un recorido y splicacion amplio. Na Museo di Oro e mandatario a combersa cu e directora sra. Maria Uribe cu a expresa e deseo cu ta biba pa hopi aña caba cerca nan pa un parti di e coleccion di Museo di Oro por wordo exhibi den Aruba su Museo Arkeologico Nacional. Na MAMU e mandatario tabata tin e placer di cera conoci cu e obranan di Fernando Botero y e coleccion priva di e artista mundialmente reconoci den cual ta figura un Picasso. E Museo di Botero tin un di e coleccionnan di arte mas importante den Latino America, cu danki na e patronahe di Banco di La Republica ta di liber acceso na publico. Na MANU tambe Minister Maduro por a bishita e exposicion Sanaduria cu ta un exposicion den cual ta explora diferente practica y sabiduria con pa yega na paz. 

Ta e intencion di Minister Maduro pa explora e posibilidad pa na Aruba tambe crea e siguridad cu museonan y salanan di exposicion por bay conta cu e fondonan necesario pa asina por keda ofrece espacio pa e Pueblo di Aruba por cera conoci cu arte y biba nos cultura.