Despues di un trayekto di kasi 3 aña i mei porfin e Lei di Bienestar di Animal por bai bira realidat despues ku esaki lo ser aprobá den Parlamento. Manera ta konosí Parlamentario mr. Giselle Mc William á inisia e proseso di lei di pa bienestar di animal huntu ku dierenbescherming i huristanan ku a mira e importansia pa yuda realisa esaki. E trayekto aki a pasa dos biaha den e proseso serka Raad van Advies pa despues di a ser adaptá, a presentá e lei aki den Parlamento aña pasa den un reunion di komishon Sentral unda no opstante e preguntanan di koleganan den Parlamento a haña sosten pa presenta e lei aki den un reunion públiko pa e ser trata i aprobá. Despues di a kontestá e preguntanan den e último reunion di Komishon Sentral e lei aki ta kla pa bin parlamento pa ser trata den reunion publiko. E lei aki manera mr. Mc William a indiká ku esaki ta e base pa un pais ku ta respetá su mes i pa sòru pa atendé ku bienestar di animal. Bienestar di animal tambe ta nifiká bienestar di nos komo habitantenan pa nos salubridat, seguridat, ekonomia i nos responsabilidat komo siudadano. Ku e lei aki frakshon di MAN ta kumpli ku un parti importante pa loke ta trata bida di animalnan na Kòrsou i pa duna nan e protekshon nesesario.
