Servisio pa Obranan Públiko (OW) ta informá ku for di djaluna 25 yanüari 2021 a kuminsá ku trabounan di mantenshon di e sistema di riolering den Lindbergweg. E trabounan ta enserá ku ta buta un tuberia prinsipal (‘hoofdleiding’) nobo pa despues pega kada kas individual riba esaki.
Motibu pa kual e trabounan mester tuma lugá ta ku e riolering ta kore di kas pa kas dor di fundeshi di e kasnan di Lindbergweg. Segun ku tempu pasa, a resultá ku na diferente kaminda e pipa di riolering ta kibrá loke ta trese un situashon a-higiéniko den e bario. Analisando e situashon, a opta pa saka kada un pipa di riolering di kada kas individual, i peg’é riba e tuberia prinsipal nobo.
E trabounan a kuminsá djaluna 25 yanüari 2021 i lo tin un durashon di mas o ménos 2 luna i mei, i ta tuma lugá den Lindbergweg na altura di kas nr. 8 te ku kas nr. 30. E trabounan ta na enkargo di e kompania Mass Con B.V. i ta bou di guia i koordinashon di funshonarionan di OW.
