A.T.A. ta desea pa informa nos comunidad di e situacion actual pa loke ta trata e industria turistico, conforme informacion compila na e momentonan aki.
TURISMO ‘STAY-OVER’
Durante luna di januari 2021 nos isla a yama bonbini na un total di 31.368 bishitante ‘stay-over’. Di e bishitantenan aki, 26.860 tawata procedente di Norte America y 1.843 tawata procedente for di diferente paisnan Europeo. 2.665 bishitante tawata procedente di otro pais/islanan den region.
E BISHITANTE Y ACOMODACIONNAN
27.1% di nos bishitantenan a keda na un high rise hotel y 6.7% a keda na un low rise hotel. 39.9% a keda na un di nos timeshare resorts. 26.3% a keda den acomodacionnan alternativo. E edad di mayoria di nos bishitantenan durante luna di januari tawata entre 20 pa 49 aña (15.624 persona) y entre 50 pa 59 aña (5.923).
HOTELNAN / AHATA
Segun Aruba Hotel and Tourism Association, na januari 2021, e ‘Average Daily Rate’ (ADR) a baha cu 20% compara cu e mesun luna na 2020. Esaki den cifra ta US$ 371.78 na 2020 compara cu US$ 297.45 pa 2021. E entrada pa camber disponibel, e asina yama RevPAR a baha cu 73.9% di US$ 286.60 na 2020 pa US$ 74.70 na 2021.
E ocupacion den nos hotelnan a baha cu 67.4% compara cu januari 2020, e occupancy pa januari 2021 tawata 25.1%
E cifranan di AHATA ta basa riba 19 propiedadnan y 6 timeshare hotels, cual ta mayoria di e hotelnan cu excepcion di Hilton Aruba Caribbean Resort & Casino.
KICO POR SPERA PA E RESTO DI E PROME KWARTAAL 2021?
Basa riba diferente desaroyo actual, y tambe analisisnan pa loke ta trata e transporte aereo, ta observa un scenario conservativo cu a wordo ahusta pa e prome kwartaal di 2021 y e proyeccion pa lunanan di februari y maart ta cu pa februari ta wordo spera un total di 34 mil turista y pa maart un total di 42 mil turista. E proyeccion revisa pa februari y pa maart ta den linea cu e scenario conservativo y aki por conclui cu por cera e prome kwartaal di 2021 cu un proyeccion bao di e scenario conservativo.
TURISMO CRUCERO
E industria di crucero a paralisa desde inicio di e pandemia y ainda no tin fecha concreto riba re-inicio di operacion den e region di Caribe. E industria ta pendiente pa CDC (Centers for Disease Control and Prevention) aproba e recomendacionnan di e protocolnan relaciona cu COVID-19 pa barconan di crucero. E situacion di e barconan cu por mira staciona den nos waf ta un asina yama ‘warm lay-up’ cual kiermen cu e barco ta riba un standby, wardando riba instruccion na momento cu operacionnan re-inicia. E actividad aki ta produci cierto entrada pa nos economia entre otro unda e barconan ta abastece nan productonan localmente. No tin turista riba e barconan pero solamente e minimo na tripulante (skeleton crew) y nan mester cumpli estrictamente cu tur protocol local y internacional pa loke ta e pandemia actual.
TOURISM CREDITS / CENTRAL BANK OF ARUBA
Di acuerdo cu Banco Central e asina yama ‘Tourism Credits’ (cual anteriomente tawata wordo yama ‘Tourism Receipts’) pa e prome 6 luna di aña 2020 a contribui cu AWG 1.174 miyon den nos economia, cu ta 40% menos compara cu e mesun temporada na 2019. Esaki naturalmente ta debi na e pandemia global di Covid-19 unda Aruba tambe a cera su fronteranan temporalmente cual a inicia na luna di maart 2021 te cu juli 2021.
Mescos cu otro destinacionnan, nos isla ta pasando den momentonan di reto pa loke ta trata e pandemia aki. Ta importante pa nos tur sigui e protocolnan manera stipula door di diferente instancianan. Hunto nos lo vence y nos isla y su turismo lo sigui florece.
