Riba proposicion di Ministernan Andin Bikker y Xiomara Maduro:
Un tema pendiente desde 2012.
Desde cambio di ley di e Codigo di procedimento penal (‘Wetboek van Strafvordering’) na 1997 a opta pa separa e autoridad di supervisa (‘toezicht’) for di esun di por investiga (‘opsporing’), y a duna personal di Aduana autoridad general pa supervision. Sinembargo tempo y leynan a bin ta cambiando y desde 2012 na e Departamento di Aduana a cuminsa sinti e necesidad pa trece un cambio pa douaneronan por haya autoridad bek di opsporing. Na december 2015 bow di e Gabinete anterior por ehempel un carta a wordo dirigi na e Minister anterior encarga cu Finansas, sr. Bermudez, pero e carta no a haya e debido atencion di e mandatario pa por a yega na un solucion.
Den un caso reciente den Corte na maart 2021 e falta di e autoridad adicional a bolbe resalta y presidente di Sindicato SADA, sr. Edward Maduro, a señala esaki na Minister di Husticia mr. Andin Bikker. Minister Bikker a tuma contacto cu Minister encarga cu Finansas, sra. mr. Xiomara Maduro, y tambe cu hefe di Douane, mr. Roderick Croes, y a propone un posibel solucion, esta pa evalua encamina e proceso pa por apunta personal di Douane como agentanan cu autoridad special (‘buitengewoon agent van politie’), mescos cu ta e caso por ehempel pa cu miembronan di Kustwacht y di NCTVI.
A haci un propocicion y e siman aki y Conseho di Ministro a bay di acuerdo pa por bay cuminsa encamina e trayectoria aki. Esaki en espera di un cambio di ley den e ley nobo di Aduana (‘ALDA’) of pa medio di e ‘Invoeringsverordening’ di e Codigo di Procedimeno Penal nobo. Pues Gabinete Wever Croes a duna atencion rapido y conciso pa busca un solucion pa un tema cu tabata pendiente desde 2012.
