Elly Hazewinkel ta e felis ganadó di kòntèst Flamingo Fun

“E kòntèst a risibí un kobertura di mas ku 28 mil bishitante riba e página di Facebook i Instagram ‘BonaireToerisme’”

kòntèst Flamingo Fun Bonaire ku a wòrdu lansá na e merkado hulandes, a yega su final. Djabièrnè último, dia 7 di mei, Tourism Corporation Bonaire (TCB) a saka e ganadó di e kòntèst ‘#FlamingoFunBonaire’ riba medionan sosial, despues di a risibí 55 vidio di partisipantenan ku a kalifiká. E selekshon a tuma lugá via di un tómbola digital.

E kòntèst ‘#FlamingoFunBonaire’ ta un di e inisiativanan di TCB i Diamond Public Relations Oropa, i a kore di 17 pa 27 di aprel riba e página hulandes di Facebook i Instagram di ‘BonaireToerisme’. E kòntèst a generá mas ku 500 siguidó nobo riba e página sosial menshoná. Tambe e vidionan ku ta forma parti di e kòntèst a generá un kobertura di mas ku 28 mil bishitante, i kasi 2 mil persona a reakshoná riba e vidionan, di forma di un ‘like’, un komentario òf komparti e vidio.

Elly Hazewinkel, ganadó di e kòntèst, a bisti un trahe di flamingo i a move manera un flamingo den koredor di e kompleho di su apartamento. Pa su esfuerso, kreatividat i partisipashon, Elly a gana un biahe di Amsterdam pa Boneiru (ida i buelta) pa 2 persona, inkluso 6 anochi den un ‘Penthouse’ na Resort Bonaire i desayuno. E premio ta bálido te ku dia 30 di aprel 2022. Primi aki pa wak e vidio.

Adishonalmente, TCB a krea un kuenta riba TikTok; ‘BonaireTourism’, kual ta aktualmente un di e plataformanan mas popular rònt mundu. TikTok ta un aplikashon di media sosial kaminda bo por kompartí un variedat di vidio kòrtiku di diferente género, manera baile, komedia, edukashon i promoshon. E meta di e kuenta di TikTok ta pa duna Boneiru mas visibilidat riba otro tipo di plataforma den media sosial.

Pa mas informashon, sigui nos riba e páginanan di Facebook i Instagram ‘BonaireToerisme’ i ‘BonaireTourism’, i tambe riba nos página di TikTok ‘BonaireTourism’. Suskribí na nos boletin mensual via e-mail na marketing@tourismbonaire.com, pa asina bo keda bon informá di e desaroyo i inisiativanan den e sektor di turismo na Boneiru.