Oficina pa relacionnan di Union Europeo y di Reino kier a invita tur esnan activo den enseñansa, deporte y hubentud y cu tin gana di expande nan horizonte y coopera ‘riba nivel internacional pa participa na e talkshow interactivo unda lo duna informacion encuanto e programa di fondo di Union Europeo “Erasmus+”.
Comision Europeo a aproba diferente programa di Fondo pa e periodo 2021-2027. “Erasmus+” ta un di e fondonan na cua organisacionnan activo den educacion, deporte of cu ta traha cu hoben por participa.
Erasmus+ ta e programa di fondo Europeo cu ta ofrece financiamento pa un area grandi di actividadnan den e ramo di educacion, training, hubentud y deporte. E programa ta pone enfasis ariba inclusion social, transicionnan berde y digital y promocion di participacion di hobennan den bida democratico.
E obhetivo di e programa ta pa realisa bon iniciativanan y proyectonan cu ta contribui structuralmente na calidad di e infrastructura di conocimento di Europa, y como tal di e islanan ultramar manera Aruba. E programa ta brinda oportunidad na studiantenan, trainees, personal y boluntarionan pa pasa un periodo den exterior pa desaroya asina nan habilidadnan y mehora nan oportunidadnan di empleo.
Tambe e ta promove pa organisacionnan traha den cooperacionnan transnacional y pa nan comparti practicanan innovativo den e areanan di educacion, di formacion y di hubentud.
Bo kier sa mas?
Den e sesion interactivo online organisa pa Erasmusplus, lo duna informacion encuanto kico e programa por significa p’abo y bo organisacion. Tambe bo lo haya informacion riba e temanan Europeo relevante pa e programa y callnan nobo cu lo sali, y bo por wordo inspira door di e proyectonan cu Hulanda den pasado a aproba.
Fecha: 22 juni 2021
Ora: 9.00 – 10.30 or (via zoom)
Idioma: Hulandes
Pa mas informacion contact: info@arubagovernment.eu
Pa registro: www.eramusplus.nl/lancering
Of bishita nos website: www.europehousearuba.org