Aruba Airport Authority N.V. (AAA), e compania cu ta maneha y opera
Aeropuerto Internacional Reina Beatrix (AUA Airport), recientemente a uni forsa cu su
manehadornan di desperdicio Total Services y Ecotech pa cuminsa varios proyecto cu lo
contribui na un maneho sostenibel di desperdicio na aeropuerto (“sustainable management of
airport waste”).
“Como resultado di e cantidad creciente di pasahero, AUA Airport tin un cantidad mas halto di
desperdicio, pero te cu awor nos no por a atende e situacion aki di forma sostenibel, mirando e
complexidad di nos operacionnan,” asina AAA su Director Health, Safety and Sustainability,
Sra. Angeline Flemming a duna di conose. “E aña aki, AAA a scohe e Sustainable Development
Goals (SDG’s) di Nacionnan Uni como un di e pilarnan strategico principal, y ta ora pa nos haci
loke cu nos ta bisa y cuminsa tuma accion. Pero pa por haci un cambio significante, nos tin cu
asocia cu nos proveedornan di maneho di desperdicio,” segun Flemming.
Na September, AAA, Ecotech y Total Services, cu a ayudo di tur e concesionarionan di
aeropuerto lo cuminsa cu un proyecto piloto pa e separacion di carton. Carton por wordo kibra y
recicla, pues conservando energia y recursonan natural mientras cu ta proteha nos medio
ambiente. Carton por wordo separa relativamente lihe y door di saca e cartonannan for di e
machinnan “waste compactors” lo yuda reduci e cantidad di desperdicio cu no por wordo recicla
tambe. Esaki ta e prome paso esencial pa por sigui separa y reduci desperdicio na AUA Airport,
y AAA ta spera cu otro compania- y entidadnan tambe lo sigui e ehempel.