Desde cu 4 aña pasa cu Minister Glenbert Croes a bira e Minister encarga cu Formacion Social (Sociale Vormingstraject), tabata su deseo pa por duna hobennan femenino tambe e mesun oportunidad.
Cuatro aña pasa nos a propone nos mes pa duna nos hobennan femenino e mesun oportunidad pa por forma parti di e trayecto di Formacion Social, pa nan tambe por tin e chens di rehace nan bida, cu un formacion nobo cu lo crea e futuro nobo cu nan tin derecho riba dje. Pa por siña biba cu etica, disciplina, compromiso y dedicacion, cu un formacion militar ta brinda cu ta bira e balornan cu lo guia- y yuda nos hobennan femenino den sigui educa nan mes pa oportunidadnan laboral nobo. 4 aña despues e vision aki ta bira realidad.”
Minister Glenbert Croes ta gradici Gobierno pa e sosten pa e vision, en especial na nos Minister Presidente Evelyn Wever Croes, Minister di Husticia Andin Bikker, pa apoya e oportunidad aki cu awe nos ta brindando nos hobennan femenino cu e trayecto di Formacion Social. Manera cu e mandatario a expresa na e hobennan durante su encuentro cu nan: “Den transcurso di bida bo lo cay lanta un paar di biaha. Pero importante ta pa semper lanta para y cana bay den e rumbo cu abo kier pa bo bida tuma.”
Minister ta agradecido na e liderasgo di Jessica Ras cu ta hoofd SVT. E mandatario ta orguyoso di nos Arumil bou liderasgo di Capitan Kelly y ta hopi agradecido na Comandante di Marinierskazerne y Ministerio di Defensa pa e apoyo y pa a kere den e vision aki. E trayecto femenino di Formacion Social/SVT ta e inspiracion pa bin cu trayectonan igual den otro paisnan di Reino Hulandes. Aruba ta e prome y ta marca historia un bes mas. E nomber di e prome 14 participanten aki, lo wordo graba pa semper pasobra nan ta e fundeshi pa e continuidad di e proyecto aki. E futuro nobo pa nan, a cuminsa 23 di augustus 2021.