DIaluna mainta pa mas o menos 10:55 central di polis ta wordo notifica di un atraco cu a caba di tuma lugar un rato prome riba e caminda di santo banda di Pizza Hut.
Na yegada di patruya ta bin compronde di e victima cu e lo mester a wordo atraca door di dos hende homber bisti full na preto den un auto color shinishi y un di nan tabata tin un arma di candela. E victima a wordo agredi door di e atracadornan.
E atracadornan lo a bay cu e auto di e compania Pizza Hut. Den e auto tabata tin e cellular di e victima y tambe un suma di afl 18.000,-. A pidi ambulance pa e victima y na unda personal di ambulance na su yegada a trate y hibe EHBO pa tratamento medico. E victima su condicion ta stabiel.
Un rato despues patruya di polis ta bin topa cu e auto cu a ser horta na un veld den e area di Bushiri. Atraco Team a presenta na e sitio pa haci nan investigacion, tambe polis technico y slachtoffer hulp.