Den un reunion ameno y fructifero Minister di Naturalesa, Sr. Ursell Arends a delinea varios punto di maneho, y tambe comparti ideanan cu miembronan di e hunta di AHATA riba entre otro temanan di desperdicio solido y likido, medio ambiente en general y naturalesa.
E no ta desconoci cu AHATA tambe ta comparti e preocupacionan di RWZI y Aruba su maneho di desperdicio, mirando con devastador e concequencianan negativo por ta di e añas di negligencia, vooral si no ta bai coregi nan. Minister Arends a segura cu punto nan aki ta netamente su prioridadnan, y di su parti ta contento di por tin e sosten di AHATA tambe, cual di su parti semper a y ta keda abierto pa yuda contribui na e solucion.
Varios preguntanan over di maneho di naturalesa tambe a bini padilanti, mustrando e necesidad pa tuma accionnan mas firme pa proteha Aruba su naturalesa y medio ambiente prome cu ta demasiado laat pa recupera. Di parti di AHATA, ta señala con importante e aspecto aki ta pa nos mercadeo internacional y posicion competitivo como isla turistico.
Minister Arends a acorda di lo duna un presentacion na AHATA tocante resultadonan di investigacionnan conduci door di DNM, y tambe lo sigui promove colaboracion entre gobierno y sector priva pa por logra metanan di desaroyo sostenibel, y semper teniendo cuenta cu derecho di naturalesa.