A informá kompanianan di aviashon ku ta bula dirèkt pa Boneiru, ku algun pasahero no por mustra nan deklarashon di salú temporalmente, komo ku nan no a haña esei. Delaster dianan algun biahero pa Boneiru ku a yena nan deklarashon di salú via www.bonairecrisis.com no a haña konfirmashon ku nan a yena e deklarashon. A pidi e kompanianan di aviashon pa laga pasaheronan ku ta kumpli ku e kondishonnan pa biaha pa Boneiru subi avion. No ta importá si nan por mustra nan deklarashon di salú òf nò.
E deklarashonnan di salú ku biaheronan a yena via www.bonairecrisis.com , ta drenta sí na departamento di Salubridat Públiko. P’esei e departamento ta pidi tur pasahero pa nan sigui yena nan deklarashon di salú. E departamento ta trahando pa sòru ku pronto tur biahero por haña un konfirmashon ora nan yena e deklarashon di salú riba e website di krísis.
