KRALENDIJK,Bonaire
Kolegio Ehekutivo a pone sèn disponibel pa hasi investigashon spesialisá pa loke ta trata e fenómeno kaminda yunan di flamingo ta muri. Diputado Elvis Tjin Asjoe huntu ku direktor Etienne van der Horst di R&O a hasi un bishita djabièrnè último na e akohida pa para riba tereno di Mangrove Center pa laga informá nan mes tokante e situashon aktual. Esaki ta e di dos aña konsekutivo ku sentenares di yu di flamingo a bandoná e área di brui na saliña di sùit promé ku tempu i bai dualu rònt. E paranan ku ta hopi sofoká, pero ku ainda nan haña na bida, nan ta hiba Bonaire Wild Bird Rehab di Elly Albers. Hopi di nan ya kaba ta asina suak, ku lamentablemente nan ta muri tòg. E flamingonan ku danki na e bon kuido di Elly i su tim sí ta sobrebibí, asina ku nan haña forsa atrobe, nan ta pone bèk den naturalesa.
Dikon e yunan di flamingo ta bai dualu rònt por lo pronto ta keda un misterio grandi. ‘Pa e motibu ei Kolegio Ehekutivo a entregá un petishon pa ayudo serka minister Carola Schouten di Agrikultura, Naturalesa i Siguridat di Kuminda pa hasi investigashon. E intenshon ta ku sientífikonan di Universidat di Wageningen ta bini Boneiru otro aña pa hasi esei’, segun Tjin Asjoe. En adelanto riba esei Kolegio Ehekutivo a pone un suma di 13.000 dòler disponibel pa riba término korto laga dos eksperto di para for di den region ku por duna un promé konseho bini Boneiru. ‘Nos flamingo ta símbolo pa e naturalesa úniko i trankilidat di nos isla. Nan ta un atrakshon turístiko importante. I nos mes komo habitantenan di e isla aki tambe ta gosa ora nos mira e manera elegante ku e paranan ros ta kana den awa en buska di kuminda.’
No tin motibu pa teme pa eksistensia di e kolonia di flamingo. ‘Pero nos ke sa sí kiko ta e kousa, di manera ku eventualmente nos por tuma medidanan dirigí pa prevení sufrimentu di e paranan aki. Mi tin atmirashon grandi pa Elly i su tim, entre nan hopi boluntario. Nan ta hasi un trabou fantástiko ku ta na interes di henter Boneiru. Afortunadamente nan por konta ku sosten di hopi donatùr’, segun diputado Tjin Asjoe.
