Cu e meta pa trece un reforma fiscal husto, simpel y eficiente
Manera cu a wordo anuncia recientemente, Departamento di Impuesto a tene su prome encuentronan cu varios ‘stakeholder’ den cuadro di introduccion di Reforma Fiscal 2023. E encuentronan aki tabata exitoso cu contribucion importante y significativo na unda cu gremionan tambe a duna nan opinion, sugerencia y posibel solucion.
Compensacionnan
Un punto crucial cu a bini dilanti ta e impacto di un sistema nobo di omzetbelasting yama “BTW” (Belasting over de Toegevoegde Waarde) riba e poder di compra di e ciudadano. Pa balansa esaki ta propone pa introduci
varios reduccion y compensacion cu lo mester cana pareu cu e introduccion di BTW. E compensacionnan manera: reduccion significativo di e tarifa di inkomstenbelasting y loonbelasting y e aumento di e suma di entrada liber di impuesto te na Afl. 36.000, lo nifica cu mas cu 40 mil persona na Aruba (trahado y pensionado) cu tin un entrada te cu di Afl. 36.000, lo no bay paga inkomstenbelasting y loonbelasting. Esaki tambe lo ta e alivio cu mayoria pensionado tin pidiendo pa hopi aña caba.
Departamento di Impuesto a splica tambe cu ta poni den e plannan pa reduci e porcentahenan y expande e “inkomensschijven” den e tabel di tarifa di inkomstenbelasting/loonbelasting y pa cuminsa cobra impuesto riba tips basa riba e maneho cu Hulanda ta aplica y introduccion di un norma di salario usual pa director/accionista mayoritario. Ta propone tambe pa aumenta e suma di bijstand y reparatietoeslag entrante 1 di Januari 2023 pa e trahadonan y nos grandinan.
Miho cumplimento di impuesto
Departamento di Impuesto ta enfatisa cu e sistema di BTW lo por garantisa un miho cumplimento di impuesto en general di e contribuyentenan. A base di esaki por reduci impuestonan y asina tambe duna mas apoyo na esnan
mas vulnerabel den nos comunidad pa nan tambe por tin mas placa den nan cartera. Esaki lo reduci e impacto di inflacion cu e implementacion di BTW lo por causa.
Den e simannan venidero, Departamento di Impuesto lo organisa ‘Breakout sessions’ pa asina sigui delibera cu “stakeholders” riba e conceptonan di reforma. Departamento di Impuesto lo percura pa procesa tur feedback ricibi y presenta e diferente ideanan y e calculonan relaciona cu e reforma fiscal durante e siguiente encuentronan aki.