Riba e di dos dia di e Ocean Conference 2022, Minister Ursell Arends a reuni cu Minister di Infrastructura y Maneho di Awa di Reino, Sr. Mark Harbers (NL), unda a duna un update riba diferente proyecto y manehonan cu ta trahando riba dje pa Aruba.
Tambe a toca e tema di e tres puntonan cu Aruba a trece dilanti durante e dialogo interactivo, cual a enfoca riba promove y fortalece un economia sostenibel basa riba e oceano.
Particularmente pa islanan chikito den desaroyo, asina conoci como “Small Island Developing States (SIDS)”, adaptacion y transicion pa sostenibilidad ta di sumo importancia. A tene combersacionnan pa explora oportunidadnan pa colaboracion y tambe pa comparti miho practicanan y experticio cu otro.
Por ultimo, a dialoga riba Aruba – como un pais cu ta forma parti di Reino Hulandes – su envolvimento pa loke ta trata e Water Conference 2023, organisa door di Hulanda conhuntamente cu Tajikistan. Esaki lo ta tumando luga otro aña na New York.
Siguramente un dia fructifero unda a elabora riba diferente manera pa Aruba por inicia, amplifica y acelera acionnan cu ta reduci presion riba nos oceano adheriendo na e Metanan Mundial pa Desaroyo Sostenibel(SDG’s) di Nacionanan Uni (UN).