E departamentu di reshèrshi di Kuerpo Polisial Hulanda Karibense (KPCN) tin di haber ku kriminal sibernétiko ku ta ataká tantu individual komo negoshi digitalmente i ta kousa daño na su sistema di kòmpiuter. Vários negoshi i organisashon na Hulanda Karibense den tempu korto a bira víktima di atake sibernétiko di ‘ransomware’. E ora ei ‘hacker’ ta eksigí sèn for di víktima pa kita lòk for di e sistema i pa kita e vírùs.
E tim sibernétiko di Kuerpo Polisial Hulanda Karibense resientemente ta miembro di e organisashon internashonal No More Ransom. No More Ransom ta ofresé yabi pa desblokiá fail blòkiá i tambe informashon tokante kon pa bo prevení ku ta infektá bo fail na promé instante. Europol, Polis Hulandes i kompanianan di seguridat di IT a lansa No More Ransom i en prinsipio tabata ofresé solamente kuater instrumento pa desblòkiá diferente tipo di ransomware i tabata optenibel solamente na Ingles.
Seis aña despues No More Ransom ta ofresé 136 instrumento grátis pa 165 variante di ransomware. Mas ku 188 partner prosedente di sektor públiko i priva a afiliá na e organisashon i regularmente ta suministrá instrumentonan pa desifrá diferente tipo di software maligno di mas nobo. Te ku awor e organisashon a yuda 1,5 mion persona ku desblòkiá nan aparatonan sin ku mester paga e kriminalnan. E portal ta optenibel den 37 idioma pa por asistí víktima di ransomware mundialmente na un mihó manera. Pronto e portal ta optenibel na Papiamentu tambe.
Pa selebrá e aniversario di seis aña di e organisashon ta duna atenshon èkstra na ransomware pa medio di publiká video ku ta mustra entre otro tep di prevenshon riba medionan sosial. Pa wak e vidionan wak riba e página di Facebook di Korps Politie Caribisch Nederland òf Rijksdienst Caribisch Nederland.
Si bo a bira víktima di atake sibernétiko menshoná ariba, òf posiblemente tabatin di haber ku otro tipo di krímen sibernétiko, tuma kontakto ku e departamento di ‘Cybercrime’ di Kuerpo Polisial Hulanda Karibense via number di telefòn 715 8000 òf via meil na cybercrime@politiekpcn.com