Korte di Promé Instansia di Kòrsou a sentensiá kuater sospechoso pa motibu di nan
partisipashon den e organisashon kriminal No Limit Soldiers (NLS).
For di 2015 e kuater personanan aki tabata forma parti di e organisashon, ku tabata atendé ku
trafikashon di droga, krimen di violensia, entre kua (intento di) asesinato i labamentu di
plaka.
E prueba kontra e sospechonan ta konsistí pa gran parti di e asina yamá kombersashonnan
PGP (Pretty Good Privacy), ku den investigashonnan na Hulanda a keda konfiská serka e
provedornan ku ta duna e servisio PGP den eksterior. Korte a disidí ku e konfiskashon di e
kombersashonnan PGP aki tabata legítimo i ta usa esaki komo prueba kontra e
sospechosonan.
Korte a sentensiá R.L. di 42 aña di edat na un kastigu di prizòn di dieskuater aña pa su
partisipashon den e organisashon, pa provoká un asesinato na e parti Franses di Sint Maarten
i pa transportá dos lote di en total 200 kilo di kokaina for di Karibe pa Fransia. L. a keda
absolbé di e akusashon di provokashon di e likidashon di un otro pèrsona, pasobra su akshon
no por a ser relashoná ku e atentado aki. Pa e motibu aki, Korte ta yega na un kastigu di prizòn
mas abou ku e bintidos aña ku fiskal di Ministerio Públiko a pidi. E suma di plaka ku a haña
serka L., tambe lo keda konfiská.
C.L. di 50 aña di edat a keda kondená na un kastigu di prizòn di ocho aña pa su ròl komo e
pèrsona ku tabata enkargá ku asuntunan finansiero di e organisashon. E tabata manehá e
entradanan prosedente di e trafikashon di droga i ku esaki e tabata kumpra entre otro
propiedatnan na Kòrsou. Tambe e tabata enbolbí den trafikashon di droga. Den transkurso di
añanan hopi miyones di florin a pasa den su man. Su bibienda, un outo, joyas i plaka ta keda
konfiská. Fiskal a anunsiá tambe ku lo bin un demanda di ekspropiashon. E demanda aki lo
keda tratá despues.
S.P. di 37 aña di edat a keda kondená na un kastigu di prizòn di seis aña pa su partisipashon
den e organisashon. P. a provoká ekstorshon di un komersiante. Tambe e tabata enbolbí den
trafikashon di droga. Banda di esaki, e tabata inbolukrá den pagamentu di e tiradonan ku a
asesiná un pèrsona na parti Hulandes di Sint Maarten, sospechá dor di e organisashon di ta
enbolbí den e asesinato di pareha di un di su lidernan. Pa loke ta trata e akusashon di provoká
un asesinato P. a keda absolbé, paso no por a prueba ku e tabata sa di antemano ku e asesinato
aki lo a bai tuma lugá. Pa e motibu aki, Korte ta yega na un kastigu di prizòn mas abou ku e
dieskuater aña ku fiskal di Ministerio Públiko a pidi.
A.E. di 35 aña di edat a keda sentensiá na un kastigu di prizòn di bintiun luna pa su
partisipashon den e organisashon i labamentu di plaka. E. tabata kore parti sèn pa
miembronan di e organisashon ku tabata será, famia i amigunan pa asina nan por kubri nan
gastunan. E suma di plaka ku a haña serka E., tambe lo keda konfiská. Durante di e proseso
E. su detenshon preventivo a keda suspendé. Teniendo kuenta ku e kastigu imponé, E. lo no
mester bai bèk prizòn. E otro tres sospechosonan tambe lo keda detené en espera di un posibel
apelashon.