Djabièrne último aspirantnan di e estudio básiko pa bira agente di Wardakosta (Basis Opleiding Kustwacht (BOK) 2022, a marcha drenta Marinebasis Parera despues di kuater siman intensivo di entrenamentu. E 18 aspirantnan di Aruba, Kòrsou i St. Maarten kada un tin un solo meta, un karera bunita na Wardakosta.
Durante e simannan di introdukshon e hòbennan pa kuater siman largu, bou di guia di nan instruktornan a sigui lès den klas i a eksperensha diferente kampamentu introduktorio. Durante e kampamentunan e aspirantnan a marcha basta kilometer, landa hopi, kushiná nan mes, a konstruí vlot i tambe a kompletá ehersisionan anfibio. Nan ehersisio final pa nan simannan di introdukshon a kuminsá djaweps último parti anochi. Pa e ehersisio final e aspirantnan a marcha i a rema riba laman ku destino final Marinebasis Parera riba djabièrne mainta. Na Marinebasis Parera e aspirantnan a keda risibí ku un aplouso kaluroso na entrada di parti di koleganan di Wardakosta i otro koleganan.
Durante e seremonia Direktor di Wardakosta, Frank Boots a hiba un diskurso pa e aspirantnan i nan instruktornan. “Boso tur 18 a yega e final, kuater siman largu boso a presta huntu komo un tim, ya asina boso tur huntu ku boso instruktornan por ta pará aki nan. Mi ta konvensí ku boso tur a siña hopi di otro. Awe boso a alkansá e marcha final. Huntu henter anochi, hopi doló, keda sin drumi i e kansansio ku kada un di boso por a eksperenshá. Esaki ta kuminsamentu di e estudio. Huntu boso a surpasá e prome fase difísil i ku tur 18 hòben ta pará akinan. Keda traha huntu pa sobrá di e aña, motivá otro i yuda otro durante e estudio. Mi ta deseá boso hopi éksito ku e sobrá di e “Basis Opleiding Kustwacht”.
Despues di e diskurso di e Direktor, e aspirantnan por a risibi nan pèchi ofisial di BOK, komo muestra di apresio pa nan prestashonnan durante e simannan di introdukshon. E siman aki e aspirantnan ta bai kuminsá ku e módulo básiko di habilidat, ku ta inkluí entre otro prome ousilio (EHBO) i habilidatnan di tiru, ku lo bai dura 8 siman. Wardakosta ta deseá e aspirantnan hopi éksito.
