Diputado di deporte sr. Pablo ‘James’ Kroon na nòmber di Gobièrnu di Boneiru a firma un letter of intent riba tereno di deporte konhuntamente ku Minister di deporte di Aruba sr. Endy Croes, minister di deporte di Kòrsou sr. Sithree van Heydoorn.
Meta di e firmamentu ta pa reinisiá weganan eskolar Interinsular ku a stòp na 2016. Indebon a bini ku e inisiativa pa ranka e proyekto aki di nobo. Kòrsou i Aruba a bai di akuerdo ku e idea. Ta e intenshon pa kuminsá e aña eskolar akí ku e weganan eskolar Interinsular.
E firmamentu a tuma lugá netamente durante e selebrashon di 40 aña di Indebon. Tambe a duna rekonosementu na diferente trahadó ku ta disfrutando di un penshun bon meresí.
Komo invitado na e anochi di e firmamentu i selebashon tabatei sr. Errol “Joy” St. Jago kende tabata e promé hefe ku Indebon a konosé. Joy a trese dilanti su trayektoria komo hefe i tambe diferente rekuerdo bunita a bini dilanti.
