Den e promé kuartal di 2023, produktonan i servisionan di konsumo na Boneiru tabata 4,5 % mas karu ku e aña anterior. Den e di kuater kuartal di 2022 inflashon ainda tabata 8,1 porshento. Por atribuí e inflashon mas abou den e dos último kuartalnan na gran parti na e supsidio riba e derechi fiho pa elektrisidat ku a kuminsá dia 1 di novèmber 2022. CBS ta indiká esaki a base di e índise di preis pa konsumidó na Hulanda Karibense.
Na Sint Eustatius, e preisnan riba base anual, ta 8,0 porshento mas haltu den e promé kuartal di 2023. Den e di kuater kuartal di 2022 inflashon tabata 9,1 porshento. E supsidio<link> riba e derechi fiho pa elektrisidat tambe tabatin un efekto di preshon riba inflashon.
Na Saba, e inflashon tabata 7,0 porshento den e promé kuartal di 2023. Den e di kuater kuartal di 2022 inflashon ainda tabata 9,7 porshento. E kousa di e efekto di preshon aki ta prinsipalmente dor di un bahada den e tarifa variabel pa elektrisidat i ademas gasolin a bira mas barata.
Inflashon ta e kambio di aña-pa-aña di e índise di preisnan di konsumidó i esaki tabata mas abou riba tur tres e islanan den e promé kuartal. Na Boneiru e kaida ta mas fuerte: for di 8,1 porshento den e di kuater kuartal pa 4,5 porshento i na St. Eustatius i Saba esaki ta ménos. Esaki no ta nifiká ku e preisnan kompará ku e di kuater kuartal a baha. E preisnan a subi ménos lihé na Boneiru i St Eustatius kompará ku e kuartalnan anterior i na Saba e preisnan a baha un tiki.
Preisnan na Boneiru a oumentá ku 0,9 porshento kompará ku e último kuartal
Kompará ku e di kuater kuartal di 2022, preisnan na Boneiru a subi den e promé kuartal ku 0,9 porshento. E kousa di e oumento aki tabata prinsipalmente dor di oumento di preisnan di produktonan di kuminda i bibida sin alkohòl. Preis di webu a hala atenshon ku un oumento di preis di 26,5 porshento kompará ku e kuartal anterior. Ademas, e preisnan di pasashinan di avion a subi ku 9,2 porshento kompará ku e kuartal anterior. Na final, e impuesto pa kue sushi a subi entrante 1 di yanüari 2023.
Elektrisidat tabata mas barata e kuartal aki dor di e supsidio menshoná promé riba e derechi fiho. Ademas, gasolin tabata 8,5 porshento mas barata i disel a baha ku 11,6 porshento den preis kompará ku e kuartal anterior.
Preisnan na Sint Eustatius a oumentá ku 0,4 porshento kompará ku e último kuartal
Preisnan pa konsumidó na Sint Eustatius a subi den e promé kuartal di 2023 ku 0,4 porshento kompará ku e di kuater kuartal di 2022. Produktonan di konsumo i bibida sin alkohòl a oumentá den preis e kuartal anterior kompará ku un kuartal promé, e preis di pan a subi ku 9,6 porshento. Artíkulonan di baño tabata 4,6 porshento mas karu i otro artíkulonan pa kuido di kurpa a eksperensiá un oumento di preis di 8,4 porshento kompará ku e kuartal anterior.
Elektrisidat tabata mas barata dor di e supsidio ku a drenta na vigor riba e isla aki dia 1 di yanüari, komo resultado e preis di elektrisidat a baha ku 7,7 porshento kompará ku e di kuater kuartal.
Preisnan na Saba a oumentá ku 0,1 porshento kompará ku e último kuartal
Na Saba, e preisnan a baha un tiki den e promé kuartal di 2023 kompará ku un kuartal promé. Gasolin tabata 9,4 porshento mas barata den e promé kuartal i e preis di disel a baha ku 8,0 porshento.
Preisnan di kuminda i bibidanan no alkohóliko i pa paña i sapatu a subi ku 1,9 porshento den e último kuartal kompará ku e kuartal anterior.
Sifranan provishonal
E sifranan durante e promé kuartal di 2023 ta provishonal i lo finalisá esakinan na e momento ku publiká sifranan di e dos kuartal di 2023.
