Minister Maduro ta gradici embahador pa Reino Hulandes na Washington DC pa su atencion pa Aruba

Na e recepcion di despedida di Aruba su GevMin na Washington DC, Minister Maduro den nomber di Gobierno di Aruba a haci uzo di e oportunidad pa despedi tambe di Embahador Andre Haspels y su señora Bernie Haspels-Grootenboer cu ta caba nan termino na Washington DC.

E mandatario a gradici Embahador Haspels pa su atencion pa cu Aruba y nos GevMin Joselin Croes den su trabounan na Washington. Minister Maduro a gradici tambe pa e bunita gesto di e Embahador y su señora pa organisa e despedida pa Aruba su GevMin na Washington DC. 

Como muestra di aprecio, Minister Maduro a presenta e Embahador cu un recuerdo y a presenta un regalo tambe na sra. Bernie cu semper tin un aprecio special pa Aruba y pa e mandatario. Tabata un renchi orea di e serie ‘Sala’ di e artista local ‘Savana Jewels’ pa recorda e manera bunita cu Aruba semper a wordo ricibi den e sala di e residencia di Embahador di Reino Hulandes pa Embahador Andre y su señora Bernie.

Minister Maduro den nomber di Gobierno di Aruba ta desea Embahador Haspels y su señora Bernie hopi exito cu nan reto nobo como Embahador di Reino Hulandes na China.

Comunicado Minister Maduro