Diadomingo ultimo tabatin un actividad na Soto caminda durante un encuentro ameno Minister Pisas a haci entrega oficial di 10 boto di piscado y 5 motor di boto na piscadonan cu nan boto a keda destrui of perde motor durante e mas recien mal tempo.
Na luna di februari tabatin un mal tempo cu a ocasiona un asina yama “zuiderwest” cu a coy varios piscado di sorpresa. A consecuencia di esaki diferente boto a keda destrui como cu piscadonan no a haña chens pa pone nan boto riba tera.
Durante su discurso Minister Pisas a mustra cu na 2011 tambe tabatin un proyecto similar caminda a haci entrega di 5 boto y 5 motor na piscadonan. Pa loke ta trata e piscadonan cu aworaki a ricibi boto of motor di boto mester bisa cu ta trata aki di piscadonan di tur parti di Corsou. Minister Pisas a anuncia tambe cu pronto den e siguiente fase lo haci entrega di 10 boto y motor mas na piscadonan. Esaki pa garantisa cu pueblo di Corsou ta dispone di suficiente pisca como esaki ta di sumo importancia pa nos siguridad alimenticio. Despues cu pastoor a bendiciona e piscadonan y e botonan a sigui un celebracion ameno cu esunnan cu tabata presente. Tabata un momento di alegria pa e piscadornan mirando cu esaki tabata e modo pa por trece cuminda na mesa pa nan famia.
