E siman aki nos representantenan den Parlamento un biaha mas ta haya e oportunidad pa demostra si nan ta sirbi interes di pueblo of interes personal den e asunto di matrimonio. Algun politico ta uza e terminomogia matrimonio civil pa purba di silencia esnan cu tin argumentonan religioso. Na Aruba ta un matrimonio so tin. Gobierno ta legalisa e union matrimonial y iglesia ta pidi Dios su bendicion riba e union aki. Algun ciudadano ta papia di separacion di religion y estado pero e prinicpio aki ta pa evita cu gobierno ta impone religion riba estado. Un Parlamentario cu ta yama su mes Cristian no por laga su principionan Cristian pafo di sala di Parlamento y vota comforme su gana personal.
Si un hende berdaderamente ta kere den Dios e ta acepta cu matrimonio ta entre un homber y un muhe. Y si un hende ta kere den evolucion, ley di naturalesa cu ta aplicabel na evolucion tambe ta bisa cu ta solamente un union entre un homber y un muhe por mantene humanidad na existencia. Ley di Dios y ley di naturalesa ta confirma loke nos codigo civil ta bisa, esta cu matrimonio ta solamente entre un homber y un muhe. Segun Corte Europeo pa Derecho Humano no ta existi derecho humano fundamental riba matrimonio homosexual. Si apesar di esaki Parlamento kier legalisa matrimonio di mesun sexo anto ta un fabor Parlamento kier duna e ciudadanonan aki. Parlamento no ta existi pa duna fabor na nos ciudadanonan. Parlamento ta existi pa reglamenta derechonan fundamental.