Diadomingo dia 15 di september ta Dia di Monumento, na unda nos ta bay celebra nos
historia, nos cultura, y e herencia cu nos antepasadonan a laga pa nos. Dia di
Monumento ta mas cu un festividad, ta un ocasion pa uni nos comunidad y honra e
legado di nos cultura. E dia aki nos ta fortalece e conexion cu nos pasado, nos ta crea
un futuro pa e generacionnan cu ta bini tras di nos. Esaki ta un dia cu no solamente ta
pone nos pensa riba e edificionan y luganan historico cu nos tin, sino tambe riba e
buniteza di e historia cu nan conta.
Relaciona cu e dia special aki, Stichting Monumentenfonds Aruba ta organisa un
“openhouse”, e portanan di nos monumentonan ta wordo habri pa ricibi comunidad y
asina comunidad por experencia e buniteza y rikeza di nos herencia. Na aña 2024,
Aruba y Boneiro lo organiza e prome Open Monumentendag den Caribe, cu e tema
“Na Caminda”. Esaki ta un proyecto piloto cu ta wordo realiza na Aruba y Boneiro cual
lo sirbi como un plataforma pa evalua, y si e resultado ta positivo, lo sigui cu un Open
Monumentendag anual den luna di April 2025, na ocasion di Dia Mundial di Cultura.
Departamento di Cultura ta sostene y participa den e bunita evento aki y pa medio di
esaki ta haci uzo di e oportunidad pa invita nos comunidad pa yega mas cerca di nos
monumentonan, cual ta un parti esencial di nos identidad. E evento aki ta pa tur hende,
di tur edad, y incluso nos turistanan cu tin interes den e herencia di Aruba. Lo tin e
oportunidad pa publico bishita e monumentonan cu normalmente ta cera pa publico.
Bishita y conoce e historia di e 13 edificionan historico y monumento di Aruba cu lo
habri nan porta pa publico entre 10 or di mainta pa 3 or di atardi. E bishitantenan lo por
participa na diferente actividad cu chens pa gana premio durante e evento final cu lo ta
entre 3 or y 5 or di atardi riba e parkeo di Postkantoor. Siguientemente e lista di e 13
edificio historico y monumento cu ta participa y nan programa:
1. Casita Geel, Weststraat 15
Actividad: Apertura pa 10 or di mainta di Dia di Monumento 2024.
Departamento di Cultura lo ta presente, lo tin Grupo Palicia, Reinanan Cultural y
animacion di DJ.
2. Postkantoor, Oranjestad
Actividad: Historia di Post y actividad pa nos muchanan.
3. Henriquez Pand, Schelpstraat 36-38:
Actividad: Lo duna informacion di e edificio y di Monumentenbureau.
4. Museo Arqueológico, Schelpstraat 40-42:
Actividad: Recorido den e edificio hunto cu miembronan di famia Ecury, Charla di
Raymundo Dijkhof, Documentario Dada Picus y actividad pa nos muchanan.
5. Stadhuis, Wilhelminastraat 8
Actividad: Presentacion di ‘Een muis in het stadhuis”.
6. School 1888, Wilhelminastraat 6
Actividad: Presentacion Slideshow historia School 1888.
7. Casa Rosada, Wilhelminastraat 58B:
Actividad: Lo ta habri pa publico bishita y admira.
8. Cas Debrot, Caya Betico Croes 98:
Actividad: Exposicion “Na Caminda” y presentacion “Memoria Ancestral”.
9. Cas di Brenchi, Ooststraat 2:
Actividad: Lo ta habri pa publico bishita y admira.
10. Botica Aruba, Steenweg 19:
Actividad: Architectenbureau Archiosa lo duna informacion di e edificio y lo tin
Arts and Crafts pa muchanan.
11. Metacorp, Wilhelminastraat 17:
Actividad: E museo lo ta habri pa publico bishita y admira.
12. Fort Zoutman:
Actividad: lo tin recorido den e edificio y lo organisa speurtocht pa nos muchanan.
13. Protestantse Kerk:
Actividad: Lo ta habri pa publico bishita y admira, y lo tin recorido den e edificio.
Lo tin diferente actividad publico
Na Cas Veneranda, situa Wilhelminastraat 7, lo tin presentacion di Lider di e Projecto
pa 2 or di atardi. Na e parke na Wilhelminastraat 72 lo tin actividad cultural cu baile y
musica bao encargo di Departamento di Cultura. Esaki lo tuma luga entre 10:30 di
mainta pa 3 or di atardi. Na e plaza chikito dilanti Museo Archeologico den Schelpstraat
lo tin presentacion di Grupo Tipico y baile entre 10 or y mey di mainta pa 3 or di atardi.
Den Ooststraat lo tin presentacion di Caha di Orgel y lo tin un vlooienmarkt
(marktkrampjes). Na e parkeo di Postkantoor lo tin e clausura di e evento cu
presentacion di banda Tsunami for di 3 or di atardi pa 5 or di atardi.
Invitacion General
Por ultimo Departamento di Cultura Aruba ta enfatiza un bes mas e importancia di un
evento manera “Open Monumentendag”, un invitacion na comunidad pa ban asisti na
e evento aki y haci esaki uno exitoso y cu e por bira un evento anual na unda nos
comunidad por participa y experencia e buniteza y rikeza di nos herencia. Un danki
special na Stichting Monumentenfonds pa organisa esaki y tur instancia cu ta participa
y nan cooperacion brinda na e prome Open Monumentendag.
