E siman aki Fitch ta evalua Aruba su economia y finansa
Aruba su reputacion financiero ta importante debi cu esey ta locual inversionista ta mira na ora di deposita nan confiansa den nos Pais. Pa sa con Aruba ta para financieramente, cada aña Aruba ta haci uzo di companianan di rating. E siman aki e compania di rating Fitch Ratings ta na Aruba pa asina evalua y duna nan opinion riba Aruba su economia y finansa.
E ehecutivonan di Fitch Ratings lo reuni cu varios persona y instancia pa nan por forma nan opinion. E prome reunion tabata cu Minister Maduro di Finansa hunto cu e ekipo di Departamento di Finansa, na unda a brinda un presentacion extenso riba e ‘performance’ di Aruba su economia y a comparti cifranan di finansa publico di nos Pais. En corto, Minister Maduro a splica cu Aruba su economia ta bayendo bon, y nos finansa publico ta mehorando cu stapnan grandi.
E aña aki ta cumpli 25 aña cu Aruba ta trahando cu e compania di rating Fitch Ratings, un hecho pa cual Minister Maduro ta gradici tur ehecutivo di e compania di rating Fitch pa nan servicio y trabou dedica na e bienestar di Aruba.